Ням гарагт Умард Солонгосын дэглэм дөрвөн өөр газраас найман ширхэг богино тусгалын баллистик пуужинг Зүүн тэнгисийн ус руу харважээ.
Өнгөрсөн долоо хоногт эхэлсэн Өмнөд Солонгос, АНУ-ын хамтарсан цэргийн сургуулилалтын хариуд Пёньяны эрх баригчид ийм арга хэмжээ авсан юм.
Тэгвэл Өмнөд Солонгос, АНУ-ын хамтарсан зэвсэгт хүчин өнөөдөр өглөө эрт Ганвон мужийн нутаг дэвсгэрээс Зүүн тэнгисийн ус руу мөн адил найман ширхэг пуужин харважээ.
Ингэхдээ газар-газар ангиллын ATACMS (Army Tactical Missile System) зэвсгээр 10 минутын турш галласан байна.
“Өмнөд Солонгос-АНУ-ын зэвсэгт хүчин газар-газар ангиллын пуужингуудыг харвасан нь өдөөн хатгалгад шуурхай хариу цохилт өгөх чадвартайгаа харуулах зорилготой байлаа” гэж хоёр улсын зэвсэгт хүчний нэгдсэн штабаас мэдээлжээ.
Умард Солонгосын өчигдөр туршсан зэвсэг нь Оросын Искандер баллистик пуужингийн загвар дээр суурилж бүтээгдсэн KN-23 пуужингууд байсан байна.
Эх сурвалж: Yonhap News