Казахстаны үндсэн хуулийн шинэчлэлийг дэмжих эсэх асуудлаар зохион байгуулагдсан бүх нийтийн санал хураалт Даваа гарагт дүнгээ гаргажээ.
Сонгогчдын 77 хувь нь үндсэн хуулийн өөрчлөлтийг дэмжсэн тухай тус улсын сонгуулийн үндэсний хорооны дарга Нурлан Абдиров мэдэгдсэн байна. Ням гарагт болж өнгөрсөн санал хураалтын ирц 68 хувийг давжээ.
Үндсэн хуулийн шинэчлэлээр Казахстаны ерөнхийлөгч асан 81 настай Нурсултан Назарбаевын үндэсний удирдагч статус, тусгай хангамжийг нь цуцалж, хамаатан садныг нь төрийн өндөр албан тушаалд ажиллахыг хориглож байгаа юм.
Назарбаев Зөвлөлт Холбоот Улсыг задарсны дараа тусгаар тогтносон Казахстан улсыг 30 орчим жил удирдаж байв.
Энэ оны нэгдүгээр сард түлш шатахууны үнийн өсөлтийг эсэргүүцсэн тэмцэл Казахстанд гарах үеэр 230 гаруй хүн амь үрэгдэж байлаа. Нэг талаар уг үйл явдлыг Назарбаевын хүч нөлөө, нийгмийн шударга бус байдлыг эсэргүүцсэн иргэдийн бухимдал гэж дүгнэж байв. Токаев тэмцэгчдийг "террористууд" хэмээн нэрлэж, ОХУ тэргүүтэй эвслийн орнуудын цэргүүд энхийг сахиулахаар Казахстанд ирж байлаа.
Үүний дараа тус улсын ерөнхийлөгч Касым-Жомарт Токаев нийгэм, эдийн засгийн томоохон шинэчлэл хийхээ амласан юм.
2019 онд Назарбаев албан тушаалаас буухдаа Токаевыг залгамжлагчаараа сонгож байжээ.
69 настай Токаев санал хураалтын өдөр хийсэн мэдэгдэлдээ үндсэн хуулийн шинэчлэлийг өөрийнх нь санаачилсан “Шинэ Казахстан” реформын дөнгөж эхлэл хэсэг болохыг онцолсон байна.
Эх сурвалж: AFP
