Нэгдүгээр Петр хааны мэндэлсний 350 жилийн ойд хүндэтгэл үзүүлэхдээ ОХУ-ын ерөнхийлөгч Владимир Путин өчигдөр Украинд явуулж буй эзлэн түрэмгийлэх дайнаа зөвтгөсөн үг хэлжээ.
Тэрбээр хаанд зориулсан музейд зочилсныхоо дараа хэлэхдээ “Их Петр хаан 21 жилийн турш Умардын Их Дайныг явуулж байсан. Тэр Шведтэй дайтаж, тэднээс ямар нэг зүйл булаан эзэлсэн тухай ойлголт байдаг. Гэхдээ тэр тэднээс юу ч аваагүй, Оросын хуучин газар нутгийг л буцааж авсан юм” гэсэн байна.
“Оросын газар нутгийг буцаан авч, улс орноо хүчирхэгжүүлэх нь өнөөдөр бидний үүрэг хэвээр байна. Хэрвээ уг үнэт зүйл маань бидний оршин тогтнох үндэс гэдгийг ойлгож чадвал зорилгоо амжилттай биелүүлэх нь гарцаагүй” гэж Путин нэмж хэлжээ.
Нэгдүгээр Петр хаан Орос орныг 43 жил захирахдаа шинэчлэлийн бодлого явуулж, Шведээс эзлэн авсан газар дээрээ өөрийн нэрээр нэрлэсэн нийслэл хотыг байгуулж байсан түүхтэй.
Европ руу харах цонх хэмээн нэрлэгдсэн Санкт-Петербург хот олон арван мянган хүний амиар босож байв.
ОХУ-ыг 23 дахь жилдээ захирч байгаа Путин сүүлийн жилүүдэд Украиныг бие даасан үндэстэн биш гэсэн санааг байнга давтаж, Оросын түүхэн үйл явдлуудыг өнөөдөртэй харьцуулан жиших болсон юм.
Тухайлбал 2020 оны дөрөвдүгээр сард ОХУ анх удаа хөл хорионы дэглэмд шилжихэд тэр тахал өвчнийг есдүгээр зууны Орост түрэг нүүдэлчид халдан довтолсон үйл явдалтай зүйрлэж байжээ.
2021 оны долдугаар сард Кремль түүний бичсэн 7,000 орчим үгтэй “Орос, Украины түүхэн нэгдлийн тухай” өгүүллийг нийтлүүлж байв. Уг өгүүлэлдээ тэр Орос, Украин хоёрыг зохиомлоор хуваагдсан нэг үндэстэн гэж тайлбарлаж байжээ.
Энэхүү нийтлэл нь Оросын зэвсэгт хүчин Украинд халдан довтлох үндэслэл болсон юм.
Путин бас Украиныг тусгаар улс болох үндсийг тавьсан Владимир Ленинийг шүүмжилж, Зөвлөлт Холбоот Улсыг хатуу гараар нэгтгэн захирч байсан Иосиф Сталиныг сайшааж байжээ.
Эх сурвалж: Reuters