Украины талд байлдаж байгаад олзлогдсон Британийн хоёр, Мароккогийн нэг иргэнд Оросын талыг баримтлагч Донецкийн Бүгд Найрамдах Улсын шүүх цаазын ял оноох шийдвэрийг өчигдөр гаргажээ.
Донецкийн Бүгд Найрамдах Улс нь Украинаас салан тусгаарласан Донбассын нэг муж бөгөөд ОХУ-аас бусад дэлхийн улс орнууд хүлээн зөвшөөрөөгүй юм.
Британийн иргэн Эйден Аслин, Шон Пиннер, Мароккогийн иргэн Брахим Саудун нарыг хөлсний цэрэг байсан, терроризм үйлдсэн гэж шүүх буруутгажээ.
Их Британи болон Украины засгийн газрууд олзлогдогсдыг хамгаалах олон улсын хуулийг зөрчсөн, үзэл суртлын агуулгатай шийдвэрийг эсэргүүцэж байгаагаа мэдэгдсэн байна.
Британийн олзлогдогсдын ар гэрийнхэн тэднийг хөлсний цэрэг байгаагүй, Украины армийн алба хаагчид байсныг баталжээ.
Өмгөөлөгчид нь шүүхийн шийдвэрийг давж заалдах гэж байгааг Оросын РИА Новости агентлаг мэдээлсэн байна.
Женевийн Конвенцын дагуу дайны олзлогдогсдын эрхийг зөрчиж болохгүйг Их Британийн засгийн газар Донецкийн салан тусгаарлагчдын захиргаанд анхааруулжээ.
Иргэдээ Оросын олзны цэргүүдээр солилцох боломжийн талаар Украины эрх баригчидтай ярилцаж байгааг бас мэдээлсэн байна.
Их Британийн гадаад хэргийн сайд Лиз Трасс уг асуудлаар өнөөдөр Украины холбогдох албаныхантай утсаар ярихаар болжээ.
28 настай Аслин нь Ноттинхэм гүнлэгийн Ньюаркын уугуул бол 48 настай Пиннер нь Уатфорд гүнлэгийн харьяат юм байна.
Тэдний залуу нь украин сүйт бүсгүйтэй бөгөөд аль аль нь 2018 оноос хойш Украинд амьдарч байжээ. Тэднийг хөлсний цэрэг биш, Украины армид алба хааж байсан тухай ар гэрийнхэн нь мэдээлсэн байна.
Аслин, Пиннер нар Мариуполь хотыг хамгаалан тулалдаж байгаад дөрөвдүгээр сард Оросын цэрэгт олзлогдож байжээ.
Эх сурвалж: BBC