Украины хямралыг тойрсон Баасан гарагийн үйл явдлуудыг тоймлон хүргэж байна.
Азовын тэнгисийн хамгийн том боомт хот Мариупольд холер өвчин гарсан тухай тус хотын захирагч өчигдөр мэдээлжээ.
Мариуполь нь Украины дайнд хамгийн ихээр сүйдсэн хотуудын нэг юм. Хот бүхэлдээ балгас болж, цэвэр усны хангамж, эрүүл мэндийн үйлчилгээ нь сүйрээд байгаа. Одоо ч хотын гудамжнуудад муудсан цогцсууд хэвтэж байгаа тухай мэдээ ирж байна.
“Цусан суулга, холерын дэгдэлт гарлаа. Энэ дайн 20,000 оршин суугчийн маань амийг хөнөөсөн бол халдварт өвчнөөр дахин олон мянган хүн үрэгдэх аюул тулгарлаа” гэж Мариуполь хотын захирагч Украины телевизээр ярьжээ.
Тэрбээр НҮБ болон Олон Улсын Улаан Загалмайн Нийгэмлэгт хандаж, үлдсэн иргэдийг нь хотоос гарч явахад шаардлагатай хүмүүнлэгийн коридор гаргахад туслахыг хүссэн байна.
Өчигдөр бас НҮБ-ын хүнсний байгууллагаас гаргасан мэдэгдэлд дайнтай холбоотойгоор Украин, Оросын хүнсний экспорт тасалдсаны улмаас ирэх нэг жилийн хугацаанд 19 сая хүн өлсгөлөнд нэрвэгдэх тооцоог зарлажээ.
Украины ерөнхийлөгч Володимир Зеленский өчигдөр Копенхаген хотод болж буй хуралд видео холбоогоор оролцон үг хэлэхдээ улс орныг нь Европын Холбоонд нэгтгэх эхний алхам хийхийг хүссэн байна.
“Украины ард түмнийг Европын гэр бүлд нэгтгэх тухай амлалт нь хоосон үг байгаагүйг Европын Холбоо батлан харуулах түүхэн алхам хийж чадна гэдэгт найдаж байна” гэж тэр хэлжээ.
Өчигдөр бас Украины дорнод хэсэгт үргэлжилж буй тулаанд их бууны хүч голлох үүрэг гүйцэтгэж байгааг Киевийн эрх баригчид мэдэгдээд Өрнөдийн орнуудад хүнд зэвсэг техник илүү олныг нэмж илгээхийг уриалсан байна.
Хэрвээ Өрнөдийн орнууд хүнд зэвсэг илгээх амлалтаа биелүүлбэл дайны хувь заяаг эргүүлэх боломжтойг тэд хэлжээ.
“Энэ дайн одоо их бууны дайн болоод байна. Бүх зүйл Өрнөдийнхөн бидэнд юу өгөхөөс шалтгаална. Украины их бууны тоо Оросынхоос 10-15 дахин бага байна” гэж Украины цэргийн тагнуулын газрын дэд дарга Вадим Скибицкий “The Guardian” сонинд ярьсан байна.
Одоо Оросын арми Украинаас зарим хэсэг нь салан тусгаарлагчдын гарт орсон Донбассын Донецк, Луганск мужуудыг бүрэн хяналтдаа оруулахаар бүх хүчээ төвлөрүүлээд байна.
Сүүлийн өдрүүдэд Северодонецк хотод Украин, Оросын зэвсэгт хүчнүүдийн хооронд маш ширүүн тулаан өрнөж байгаа. Хэрвээ Оросын тал энэ хотыг эзэлбэл Луганск мужийг бүрэн хяналтдаа оруулах боломж нээгдэх юм.
Сүүлийн байдлаар Северодонецкийн орон сууцны дүүргүүдийг Оросын цэргүүд эзэлсэн ч хотын зах дахь аж үйлдвэрийн бүсэд Украины цэргүүд хориглон тулалдаж байгаа гэсэн мэдээ ирж байна.
Эх сурвалж: Reuters