Өмнөд Солонгосын К-поп ертөнцөөс анх удаа дэлхийн хэмжээний одод болж чадсан BTS хамтлагийн гишүүд уран бүтээлээ түр завсарлахаар болсныг өчигдөр зарлажээ.
Тэд одоо тус тусын ганцаарчилсан уран бүтээлүүд дээрээ ажиллаж эхлэх гэнэ.
Улс орныхоо эдийн засагт олон тэрбумын орлого оруулдаг гэгддэг долоон гишүүн өчигдөр орой хамтлаг байгуулагдсаны ойд зориулсан уламжлалт оройн зоогийн үеэр шийдвэрээ зарлажээ. Уг арга хэмжээний видео бичлэг хамтлагийн YouTube сувагт нийтлэгдсэн байна.
“Бид одоо завсарлага авч байна” гэж хамтлагийн 29 настай гишүүн Сүга арга хэмжээний үеэр хэлсэн юм.
“Завсарлага” гэдэг үгийг ажиглагчид түр амсхийж, тус тусын ганцаарчилсан уран бүтээл туурвихад цагаа зарцуулах гэсэн санаа гэж тайлбарлажээ.
Сүүлийн хэдэн дуугаа хийсний дараа тэд нэлээд “цуцаж”, өөрсдийгөө “яг ямар төрлийн хамтлаг болсноо ойлгохгүй болсон” гэж хамтлагийн 27 настай гишүүн M ярьсан байна.
“BTS-ийг би үргэлж бусад хамтлагуудаас ялгаатай гэж боддог байсан. Гэхдээ К-поп од төрүүлэх системийн нэг асуудал бол тэдэнд төлөвших хугацаа өгдөггүй явдал юм” гэж тэр цааш нь ярьжээ.
26 настай Жимин “Бид одоо бүх зүйлийг бага багаар цэгцлэхийг хичээж байна. Фэнүүддээ яг ямар уран бүтээлч байснаар дурсагдаж үлдэхээ бид бодож эхэлсэн” гэж ярьсан байна.
“Бид одоо хүнд цаг үеийг туулж байна. Бид өөрсдийн мөн чанарыг олохыг хичээж байна. Энэ бол урт удаан бөгөөд шаналгаатай үйл явц юм” гэж тэр нэмж хэлсэн юм.
28 настай J-Hope “Хамтлагийн гишүүд маань тус тусдаа байж, дахин хэрхэн нэгдэх талаараа бодох хэрэгтэй боллоо. Та бүхнээс үүнийг битгий сөргөөр хүлээж аваасай гэж би хүсэж байна. Үүнийг эрүүл үйл явц гэж харах хэрэгтэй” гэж ярьжээ.
Сүга “Энэ бол таралт биш, бид зүгээр л хэсэг хугацаанд тусдаа байх юм” гэж фэнүүддээ амласан байна.
24 настай Жүнкүк “Бид хэзээ нэг өдөр дахин нэгдэхдээ одоогийнхоосоо илүү төлөвшсөн байх болно” гэж хэлжээ.
BTS хамтлаг Billboard-ийн АНУ-ын шилдэг дууны жагсаалтыг тэргүүлсэн анхны солонгос уран бүтээлч болж байв.
Тэдний дөрвөн цомог хоёр жил хүрэхгүй хугацаанд Америкийн шилдгийн жагсаалтыг тэргүүлсэн нь домогт Битлз хамтлагийн гаргасан амжилттай дүйцэж байжээ.
Саяхан тус хамтлагийн гишүүд Цагаан ордонд зочилж, АНУ-ын ерөнхийлөгч Жо Байдентай тус улсын Ази гаралтай иргэдийн эсрэг гэмт хэрэгтэй хэрхэн тэмцэх талаар санал солилцсон юм.
Эх сурвалж: Reuters
