Оросын сөрөг хүчний удирдагч Алексей Навальный одоо 11.5 жилийн хорих ялаа шоронд эдэлж байгаа.
Эрх баригчид түүнийг гэнэт өөр шорон руу шилжүүлсэн тухай туслах нь сошиал хуудсандаа өчигдөр мэдээлжээ.
Навальный одоо хаана байгааг хэн ч мэдэхгүй байна. Өнгөрсөн сард видео холбоогоор шүүх хуралд оролцохдоо тэр ОХУ-ын ерөнхийлөгч Владимир Путинийг утга учиргүй дайн өдөөж, орос, украин хүмүүсийн цусыг урсгаж буй “солиотой хүн” хэмээн шүүмжилж байв.
Москва хотоос зүүн зүгт 120 км зайтай оршдог Навальный хоригдож буй шоронд эргэлтээр очиход “Энд ийм нэртэй хоригдол байхгүй” гэсэн хариу өгснийг түүний туслах Леонид Волков мэдээлжээ.
Навальныйг Москвагаас зүүн зүгт 250 км зайтай оршдог ИК-6 Мелехово чанга дэглэмтэй шоронд шилжүүлсэн байж болзошгүй гэж ойрын хүмүүс нь таамаглаж байгаа гэнэ.
“Түүнийг өөр шоронд шилжүүлсэн нь гол биш, Алексей хаана байгааг бид мэдэхгүй байгаа нь илүү аймшигтай байна” гэж Навальныйн хэвлэлийн төлөөлөгч Кира Ярмыш мэдэгджээ.
Путиний хамгийн том шүүмжлэгчдийн нэг гэгддэг Навальный хоёр жилийн өмнө учир битүүлэг шалтгаанаар хордсоныхоо дараа Германд эмчлүүлж байв.
2021 онд тэр Германаас ОХУ-д ирээд тэнсэн харгалзах ялын нөхцөлийг зөрчсөн шалтгаанаар баривчлагдаж байжээ.
Навальный өөрийг нь Оросын нууц цагдаагийн албаны офицер Новичок химийн бодисоор хордуулсан гэж үздэг.
Энэ оны гуравдугаар сард болсон шүүх хурлаар залилан мэхэлсэн, шүүхийг үл хүндэтгэсэн хэрэг түүнд тулгаж, есөн жилийн хорих ял нэмж оноосон юм.
Навальныйг хоригдсоноос хойш түүний удирддаг байгууллагыг ОХУ-ын эрх баригчид “экстремист байгууллага” хэмээн нэрлэж, үйл ажиллагааг нь хориглож, хамтрагчдын зарим нь баривчлагдаж, зарим нь гадаадад дүрвэсэн юм.
Эх сурвалж: Reuters
