УИХ-ын Хууль зүйн байнгын хорооны өчигдрийн хуралдаанаар Шүүхийн шийдвэр гүйцэтгэх тухай хуульд өөрчлөлт оруулах тухай хуулийн төслийг хэлэлцсэн.

Энэ үеэр УИХ-ын гишүүн Б.Энхбаяр Шүүхийн шийдвэр гүйцэтгэх ерөнхий газрын дарга Д.Загджаваас дуучин Б.Анхбаяр буюу A cool-ийг албан тушаалд томилохдоо хошууч цол олгосон явдлыг тодруулав.

Тэрбээр “Шүүхийн шийдвэр гүйцэтгэх байгууллага нь цэргийн байгууллага биш л дээ. Үе үеийн дарга нар нь генерал цол авах гээд энэ байгууллагыг зэвсэгт хүчинд оруулаад яваад байдаг.

Цэрэг, цагдаагийнхан тэтгэврээ бусад хуулиар нэмүүлсээр байгаад эрт гардаг, бусад төрийн албан хаагчдаас өндөр тэтгэвэр авдаг болсон.

Д.Загджав дарга та саяхан дуучин A cool-д хошууч цол өгсөн байсан. Танайх цол яаж олгодог юм бэ. Хошууч цолыг их өндөр цол гэж ойлгодог. Олон жил ажилласан хүн авдаг. Цол олгохдоо ажилласан жилийг нь харгалздаггүй юм уу.

Танайхаас тэтгэвэрт гарахаар өндөр тогтоолгодог. Тэгвэл дуучин A cool тэтгэвэрт гарахдаа хэдэн төгрөгийн тэтгэвэр авах уу" гэв.

Түүний асуултад ШШГЕГ-ын дарга Д.Загджав "Бид Цэргийн албаны тухай хуулийн дагуу цол олгодог. Шаардлагатай тохиолдолд тусгай мэргэжилтэнд амжилтаар нь цэргийн цолыг хугацаанаас нь өмнө өгч болдог. Энэ дагуу чуулгын даргаар томилогдсон дуучин Б.Анхбаярт хошууч цол олгосон. Шүүхийн шийдвэр гүйцэтгэх байгууллын дарга дэд хурандаа хүртэл цол олгох эрхтэй.

Нөгөөтэйгүүр хошууч Б.Анхбаярт хэдэн төгрөгийн тэтгэвэр олгох нь тухайн хүний алба хаасан хугацаанаас хамаарах учир урьдчилан хэлэх боломжгүй байна" гэдэг хариулт өглөө.