Пүрэв гарагт Европын дөрвөн улсын удирдагчид Украины нийслэл Киев хотод айлчилсан нь дайны цаг үеийн ховор сонин үзэгдэл боллоо.
Баруун Европын хүчирхэг гүрнүүд болох Герман, Франц, Италийн удирдагчдаас гадна Украинтай хил залгаа Румын улсын ерөнхийлөгч өчигдөр Киев хотод айлчлан очиж, Украины засгийн газар, ард түмэнтэй эв санааны нэгдэлтэй байгаагаа илэрхийлсэн юм.
Тэд Украин улсыг Европын Холбооны гишүүнээр элсэх албан ёсны нэр дэвшигчийн статустай болоход дэмжихээ амласан байна.
Үүнээс гадна Францын ерөнхийлөгч Эммануэл Макрон зургаан ширхэг өөрөө явагч их бууны системийг нэмж Украинд илгээх болсноо зарласан юм.
ОХУ-тай харилцаагаа муутгахаас болгоомжилдог хэмээн шүүмжлүүлж байсан Герман, Франц, Италийн төр засгийн тэргүүнүүд ийнхүү Киевт айлчилсан нь Украины талд сэтгэл санааны томоохон дэмжлэг болж байна.
Киев хотод ирснийхээ дараа удирдагчид нийслэлийн ойролцоох Ирпин тосгонд очиж, эзлэн түрэмгийлэгчдийн учруулсан хохиролтой биечлэн танилцжээ.
Уг тосгон Украины дайны эхэн үед Оросын цэрэгт эзлэгдэж байсан ба тэднийг орхиж явсны дараа дайны гэмт хэргийн маш олон баримт илэрч байсан юм.
Өрнөдийн орнуудын илгээсэн зэвсгийн тусламжийн ачаар Украины арми Оросын цэргийн нийслэл Киев рүү хийсэн довтолгоог няцааж чадсан.
Тэгвэл одоо Украины дорнод нутаг Донбассын фронт дээр хүнд зэр зэвсэг маш их хэрэгтэй байгааг Киевийн эрх баригчид Өрнөдийн холбоотнууддаа байнга илэрхийлж байгаа.
Өрнөдийн удирдагчдын айлчлалын үр дүнгээс Украинчууд ихийг хүлээж байгаа ч зарим нь санаа зовж буйгаа нуухгүй байна.
Тухайлбал дайны гол талбар болоод буй Луганск мужийн захирагч Сергей Хайдай хэрвээ Өрнөдийн удирдагчид газар нутгаасаа ОХУ-д өгөх замаар энхийн гэрээ байгуулах талаар ярилцахаар ирсэн бол айлчлал ямар ч үр дүнгүй болно гэж үзэж байна.
“Манай ерөнхийлөгч Володимир Зеленский буулт хийх, газар нутгаа наймаалцах тухай ярихгүй гэдэгт би итгэлтэй байна. Хэрвээ хэн нэгэн Оросуудад газар нутгаа өгөх замаар дайныг зогсоохыг хүсэж байгаа бол Герман улс Бавари мужаа, Итали улс Тускани мужаа, Франц улс Прованс мужаа өгөх хэрэгтэй. Өнөөдөр нэг улс нь газар нутгаа алдвал маргааш бас нэг улс, нөгөөдөр бас нэг улс алдах болно” гэж тэр ярьжээ.
Ирпин тосгонтой танилцсаныхаа дараа Германы канцлер Олаф Шольц “Цэргийн ямар ч дэд бүтэц, байгууламжгүй тосгон бүхэлдээ устаж, гэмгүй иргэд нь алагдаж, орон гэр нь сүйрснийг харлаа. Энэ нь Оросын эзлэн түрэмгийлэх дайн ямар харгис хэрцгий болохыг батлан харуулж байна. Бид шийдвэр гаргах бүрдээ энэ талаар санаж байх ёстой” гэж хэлсэн юм.
Италийн ерөнхий сайд Марио Драги дайны дараах Украины сэргээн босголтод Европчууд туслахыг амлажээ. “Сүйрсэн асрамжийн газрууд, тоглоомын талбайнуудаас эхлээд бүгдийг шинээр сэргээн босгох болно” гэж тэр Ирпин тосгонд зочлох үеэрээ мэдэгдсэн юм.
Дараа нь Драги твиттер хуудсандаа “Аймшигт сүйтгэл, хүмүүнлэгийн гамшгийг үгээр илэрхийлэх арга алга. Оросын бүх зандалчдад олон улсын эрүүгийн хэргийн шүүх хариуцлага тооцох болно” гэж бичжээ.
Эх сурвалж: Associated Press