Олон Улсын Эрүүгийн Шүүхэд ажилтнаар нэвтрэх гэсэн Оросын тагнуулчийн оролдлогыг таслан зогсоож, баривчилснаа Нидерландын тагнуулын алба өчигдөр мэдээлжээ.

36 настай Сергей Владимирович Черкасов нь ГРУ гэгддэг Оросын цэргийн тагнуулын байгууллагын нууц ажилтан юм байна.

Тэрбээр 33 настай Бразилын иргэн Виктор Мюллер Феррейрагийн нэрээр дөрөвдүгээр сард Нидерландад ирж байжээ.

Гэхдээ Өрнөдийн тагнуулын байгууллагууд түүнийг ирэхээс нь өмнө илрүүлээд байсан гэнэ.

Олон Улсын Эрүүгийн Шүүхэд дадлагажигчаар ажилд орох гэж ирэхэд нь түүнийг баривчилж, Бразил руу буцаасан байна.

Хэрвээ Черкасов шүүхэд ажиллаж эхэлсэн бол Оростой холбоотой дайны гэмт хэргийн баримтуудыг устгах байсан гэж Нидерландын албаныхан үзэж байна.

Черкасовыг арав гаруй жилийн өмнөөс Бразилд хуурамч нэрээр амьдруулж, бэлдсэн юм байна. Энэ нь Зөвлөлтийн үед хэрэглэдэг байгаад сүүлд ОХУ-ын ерөнхийлөгч Владимир Путиний үед дахин сэргээсэн хүйтэн дайны үеийн арга гэнэ.

Черкасов 2010 оноос хойш Мюллер нэрээр Бразилд амьдарч, 2014-2018 онуудад Даблины Тринити Коллежийг улс төр судлалын мэргэжлээр дүүргэж, дараа нь Балтимор дахь Жон Хопкинсийн их сургуульд АНУ-ын улс төр судлалаар мастерын зэрэг хамгаалжээ.

Жон Хопкинсийн их сургуулийн профессор Южин Финкел твиттер хуудсандаа өөрийгөө “бразил/ирланд” гаралтай гэж танилцуулсан Миллер оюутан нь байсныг батлан бичсэн байна.

Бүр Олон Улсын Эрүүгийн Шүүхэд ажилд орохын тулд өөрөөс нь тодорхойлолт авч байсныг бичжээ.

“Би түүнд тодорхойлолт бичиж өгсөн. Маш сайн тодорхойлолт. Тиймээ, би ГРУ-гийн офицерт тодорхойлолт бичиж өгчээ. Би хэзээ ч үүнийг мартахгүй. Би ГРУ-тай холбоотой бүхнийг үзэн ядаж байна. Түүнийг илрүүлсэнд маш их баяртай байна” гэж тэр бичсэн байна.

Олон Улсын Эрүүгийн Шүүх жил бүр хууль, нийгмийн сэтгэл зүйгээр төгссөн 200 оюутныг дадлагажигчаар ажиллуулдаг ажээ. Тус байгууллагын төлөөлөгч тагнуулч шургалах гэж байсныг илрүүлсэн Нидерландын нууц албаныханд талархал илэрхийлсэн байна.

Одоо Черкасовын хэргийн шүүх хурлыг Бразил улсад зохион байгуулах тухай Нидерландын тал мэдээлжээ.

Нидерландын тагнуулын газрын ерөнхий захирал Эрик Акербүм “Оросууд Олон Улсын Эрүүгийн Шүүхийн мэдээлэлд хууль бус аргаар хандахыг оролдож буй нь эндээс тодорхой харагдаж байна. Бид уг хэргийг ноцтой аюул заналын ангилалд оруулсан” гэж ярьсан байна.

Эх сурвалж: The Guardian