Энэ долоо хоногоос эхлэн ОХУ-ын Хар тэнгисийн Новороссийск боомт Казахстаны газрын тосны экспортыг тодорхойгүй хугацаагаар зогсоожээ.
Далайд гарцгүй Казахстан улс уг боомтоор газрын тосоо гадаад зах зээлд хүргэдэг юм. Казахстаныг Новороссийск боомттой холбосон дамжуулах хоолойг Caspian Pipeline Consortium (CPC) хариуцаж ажиллуулдаг.
Сүүлийн 20 гаруй жил ашиглагдсан дамжуулах хоолой нь өдөрт 1.4 сая баррель хүртэл газрын тос дамжуулах багтаамжтай юм.
Оросын тал Казахстаны экспортыг зогсоосон шалтгаанаа боомтын ойролцоо тэнгисийн ёроолоос дэлхийн хоёрдугаар дайны үеийн тэсрээгүй мина олноор олдсонтой холбон тайлбарлаж байна.
Минануудыг аюулгүй болгох хүртэл экспортыг зогсоохоо мэдэгджээ.
Үүний дараа Казахстан улс өөрийн нутгаар дамжин өнгөрөх Оросын 1,700 вагон нүүрсийг саатуулсан байна.
Үүнийгээ Украины дайнтай холбоотой ОХУ-ын эсрэг тавьсан олон улсын хоригийг зөрчихөөс зайлсхийсэн шийдвэр гэж тайлбарлажээ.
Гэхдээ ажиглагчид Казахстаны газрын тосны экспортыг зогсоосон Оросын талын шийдвэр нь өөр улс төрийн шалтгаантай байж болзошгүй гэж үзэж байна. Тухайлбал өнгөрсөн долоо хоногт Санкт-Петербургийн Олон Улсын Эдийн Засгийн Чуулганд Казахстаны ерөнхийлөгч Касым-Жомарт Токаев оролцохдоо Украинаас салан тусгаарласан Донецк, Луганскийн Бүгд Найрамдах Улсуудыг хүлээн зөвшөөрөх боломжгүйг ОХУ-ын ерөнхийлөгч Владимир Путиний нүүрэн дээр хэлж байсан юм.
“Хэрвээ үндэстнүүдэд өөрийн тусгаар тогтнолыг зарлах эрх өгвөл өнөөдрийн НҮБ-ын гишүүн 193 улсын оронд дэлхий дээр 500, 600 улс бий болох байх гэж тооцоолж байна. Ингэвэл эмх замбараагүй байдал бий болно. Ийм учраас бид Тайвань, Косово, Өмнөд Осет, Абхазыг хүлээн зөвшөөрдөггүй. Луганск, Донецк зэрэг тоглоомын улсуудад ч энэ зарчим үйлчилнэ” гэж Кремлийн алдартай суртал нэвтрүүлэгч Маргарита Симоньяны тулгасан асуултад тэр хариулж байв.
Эх сурвалж: Коммерсант, news.ru
