Хүүхдүүд нэгнээ бүлэглэн зодсон хэргийн талаар цагдаагийн байгууллагаас мэдээлэл өглөө.
ЦЕГ-ийн Хэвлэл мэдээллийн төвийн мэргэжилтэн Д.Оюун “Хүүхдүүд нэгнээ бүлэглэн зодож танхайрсан хэрэгт ямар хариуцлага оногдуулахыг шүүхээс тогтооно.
Тодруулбал, ямар үйлдлээс болж тухайн хүнд ямар гэмтэл учруулснаас шалтгаалж шалгалт дууссаны дараа шүүхийн байгууллагаас ямар шийтгэл оногдуулахыг эцэслэн тогтоодог.
Зодуулсан хүүхдийн биеийн байдалд одоогоор өөрчлөлт илрээгүй. Гэхдээ нарийн шинжилгээ үргэлжлэн хийгдэнэ.
Тухайн хүүхдийн ар гэрийнхэн нь бусдад зодуулсан гэдгийг тухайн үед мэдээгүй бөгөөд бичлэгээс дүүгээ зодуулсан гэдгийг мэдсэн. Хохирсон болон холбогдогч хүүхдүүдээс мэдүүлэг авахад хамтарсан баг ажилладаг бөгөөд багт сэтгэл зүйч хамт ажиллаж байгаа.
Он гарсаар хүүхэд үйлдсэн 600 орчим гэмт хэрэг бүртгэгдсэн. Үүнд зөвхөн биеэ дээрэлхэх гэдгээс гадна залилах, дээрэмдэх зэрэг гэмт хэргүүд багтаж буй.
Энэ тоо нь өсвөр насны хүүхдүүдээс үйлдсэн гэмт хэргийн хувьд өндөр учраас хууль эрх зүйн мэдлэгийг нэмэгдүүлэх, асран хамгаалагч, эцэг эхийн зүгээс хүүхдээ хэнтэй хэрхэн чөлөөт цагаа өнгөрүүлж байгааг анхаарч, ярилцах шаардлагатай байна" гэсэн юм.
