ОХУ-ын батлан хамгаалахын сайд Сергей Шойгу анх удаагаа Украинд хүрэлцэн очсон тухай албаны эх сурвалж Ням гарагт мэдээлжээ.
Дүрэмт хувцастай Шойгу нисдэг тэрэгнээс бууж, командлагчдаас дайны нөхцөл байдлын талаар мэдээлэл сонсож, үүрэг чиглэл өгч байгааг ОХУ-ын батлан хамгаалах яамнаас тараасан дүрс бичлэг харуулсан байна.
Түүнийг яг хэзээ, Украины аль хэсэгт очсон тухай уг мэдээнд дурдаагүй юм. Шойгу энэ үеэр Украинд явуулж буй “цэргийн тусгай ажиллагаа”-нд гавьяа байгуулсан цэрэг дайчдад одон медаль зүүж өгснийг дүрс бичлэгт харуулжээ.
ОХУ-ын зэвсэгт хүчин Украины нутаг дэвсгэрт халдан довтлоод дөрвөн сарын хугацаа өнгөрч байна. Оросын армийн довтолгоо удааширч, төлөвлөж байснаас урагш муутай байгаагийн гол буруутан нь Сергей Шойгу гэсэн яриа байдаг. Гэвч Москвагийн эрх баригчид Украин дахь байлдааны ажиллагаа нь төлөвлөгөөний дагуу хэрэгжиж буйг дахин дахин илэрхийлсээр байгаа.
