Оросын зэвсэгт хүчин Украины газар нутагт халдан довтолсноос хойших хамгийн том олзны цэрэг солилцоо дайтагч талуудын хооронд өчигдөр явагджээ.
Уг солилцоогоор олзлогдсон 144 цэргээ шилжүүлж авсны дотор Мариуполь хотыг хамгаалан тулалдаж байсан 95 хүн байгааг Украины цэргийн тагнуулын алба мэдээлсэн байна.
Суллагдсан цэргүүдийн ихэнх нь сум болон тэсрэх бөмбөгний хүнд шархтай, үе мөчөө тайруулсан, түлэгдэж, ясаа хугалсан зэрэг эрүүл мэндийн хувьд ноцтой хохирсон хүмүүс байгаа ажээ.
Олзны хүмүүсийг солилцсон тухай Оросын тал ямар нэг мэдэгдэл хийгээгүй байна.
Харин Донецкийн салан тусгаарлагчдын тэргүүн Денис Пушилин өөрийн болон Оросын армийн олзлогдсон 144 цэргийг суллуулснаа мэдээлжээ.
Дайн эхэлснээс хойш Украины олон зуун цэрэг олзлогдож, Донбасс дахь Оросын армийн хяналтын бүсэд болон ОХУ-ын нутаг дэвсгэрт хоригдож байгаа гэсэн мэдээлэл бий. Гэхдээ нарийн тоог нь гаргах боломжгүй байгаа.
Энэ удаагийн солилцоогоор суллагдсан Мариуполийн хамгаалагчдын дотор Оросын тал хэт үндсэрхэг үзэлтнүүд, нацистууд гэж үздэг Азовын батальоны 43 гишүүн багтсаныг Украины тал мэдээлжээ.
Эх сурвалж: AFP
