Дэлхийн зах зээлд Хятадын юанийн нөлөө нэмэгдэж, Америк долларын давамгайлалд заналхийлж байгааг шинэ судалгааны тайлан харуулсан байна.
Энэ тухай UBS Asset Management байгууллагын жил тутмын судалгааны тайлан өнгөрсөн Баасан гарагт нийтлэгджээ. Судалгаанд оролцсон дэлхийн топ 30 төв банкны 85 хувь нь Хятадын юанийг нөөцийн валютаараа сонгосон буюу сонгохоор судалж байгаагаа илэрхийлсэн байна.
Энэ нь жилийн өмнөх үзүүлэлтээс 81 хувиар өссөн дүн болжээ.
Төв банкнуудын гадаад валютын менежэрүүд ирэх арван жилийн хугацаанд нийт нөөцийнхөө 5.8 хувийг юань болгох төлөвлөгөөтэй байгаа нь жилийн өмнөх үзүүлэлтээс 5.7 хувиар өссөн дүн юм байна.
Украинд дайн эхлүүлсэнтэй холбогдуулан ОХУ-ын гадаад валютын нөөцийг АНУ тэргүүтэй өрнөдийн холбоотнууд царцаасан нь үүнд тодорхой хэмжээгээр нөлөөлсөн гэж судлаачид дүгнэжээ. Өөрөөр хэлбэл нөөцөө нэг валютаас хэт хамааралтай байлгах нь эрсдэлтэйг энэ явдал харуулсан байна.
Төв банкнууд үндэсний валютынхаа ханшийг хамгаалах, хямралын үед ашиглах зорилгоор гадаад валют нөөцөлдөг. 2022 оны зургаадугаар сарын байдлаар судалгаанд оролцсон төв банкнуудын гадаад валютын нөөц дэх Америк долларын хэмжээ 69 хувь байжээ.
Энэ нь жилийн өмнөхөөс 69 хувиар буурсан үзүүлэлт юм байна.
Хэдийгээр Хятадын юанийн эрэлт нэмэгдсэн ч дэлхийн зах зээлд Америк долларын ноёрхлыг халахад хол байгааг энэхүү судалгаа бас харуулжээ.
Тухайлбал Бээжингийн коммунист дэглэм өөрөө Хятадын юанийг эрсдэлтэй хөрөнгө болгож байгааг зарим шинжээчид анхааруулсан байна.
Мөн цар тахалтай тэмцэж буй Хятадын засгийн газрын “Тэг Ковид” стратеги тус улсын эдийн засагт итгэх итгэлийг сулруулж байгааг дурджээ.
Эх сурвалж: Business Insider
