Японы автомашин үйлдвэрлэгч Тоёота компани алдарт Crown загвараа дэлхийн зах зээлд анх удаа гаргах болсноо өчигдөр зарлажээ.
“Crown загварын шинэ бүтээгдэхүүнийг зөвхөн Японы зах зээлд биш, дэлхийн зах зээлд гаргах болсныг дуулгахдаа таатай байна” гэж Тоёота компанийн гүйцэтгэх захирал Акио Тоёода өчигдөр сэтгүүлчидтэй уулзахдаа хэлсэн байна.
Ирэх оны нэгдүгээр сард үйлдвэрлэж эхлэх 16 дугаар үеийн Crown загвар нь дөрвөн хувилбартай байх гэнэ.
Эдгээр нь гибрид системтэй кроссовер, Японы зах зээлд гардагтай төстэй седан, SUV, “estate” нэртэй вагон кроссовер байх ажээ.
Шинэ Crown-ийг дэлхийн 40 орны зах зээлд гаргах ба жилд 200,000 ширхгийг борлуулахаар төлөвлөсөн байна.
Хамгийн хямд хувилбарынх нь Японд зарагдах үнэ 4.35 сая иен ($31,400) байх ажээ.
Японы хамгийн том автомашин үйлдвэрлэгч Тоёота дэлхий даяар жил бүр 10 сая бүтээгдэхүүн борлуулдаг.
Crown загварын хувьд анх 1955 онд худалдаанд гарч байжээ. Тоёотаг үүсгэн байгуулагч Киичиро Тоёода уг загварын нэрийг өгч байсан юм.
“Японы Crown-ийг дэлхийн олон орны иргэдийн хайртай автомашин болгохоос илүү аз жаргал надад байхгүй” гэж түүний ач хүү Акио Тоёода ярьж байна.
Эх сурвалж: Associated Press
