Өчигдөр ОХУ-ын гадаад хэргийн сайд Сергей Лавров тус улсын Украинд явуулж буй дайны төлөвлөгөө зөвхөн Донбассын бүс нутгийг эзлээд зогсохгүй, цааш өргөжиж болзошгүйг Өрнөдийн орнуудад анхааруулжээ.
Энэ оны хоёрдугаар сарын 24-ний өдөр “цэргийн тусгай ажиллагаа” эхлүүлэхдээ Путин хөрш Украиныг “нацизмаас бүрэн ангижруулах” зорилт зарлаж байв.
Дараа нь нийслэл Киевийг эзлэх төлөвлөгөөнөөсөө татгалзсан Москвагийн эрх баригчид зорилгоо өөрчилж, зөвхөн Донбассын бүс нутгийг “чөлөөлөх” болсноо зарласан юм.
Гэвч гуравдугаар сарын сүүлээр Туркийн нутаг дэвсгэрт болсон энхийн яриа хэлэлцээнээс хойш нөхцөл байдал нэлээд өөр болсныг Лавров хэлсэн байна.
“Одоо газрын зураг өөрчлөгдөж, зөвхөн Донецкийн БНУ (Бүгд Найрамдах Улс), Луганскийн БНУ-аар хязгаарлагдахгүй болсон. Херсон, Запорожье болон бусад хэд хэдэн бүс нутаг нэмэгдлээ. Энэ үйл явц логиктой бөгөөд тууштай үргэлжилж байна” гэж тэр өчигдөр Оросын төрийн төв хэвлэлд өгсөн ярилцлагадаа өгүүлжээ.
Хэрвээ Өрнөдийн орнууд алсын тусгалын зэр зэвсэг Украинд нийлүүлж, нөхцөл байдлыг хурцатгасаар байх юм бол Оросын арми довтолгоогоо газар нутгийн гүн рүү улам эрчимжүүлж болзошгүйг Лавров анхааруулсан байна.
“Энэ нь төлөвлөгөө маань газарзүй талаасаа улам өргөжиж, одоогийн фронтын шугамаас цааш ахина гэсэн үг” гэж тэр хэлжээ.
Лавровын мэдэгдлийн хариуд Украины гадаад хэргийн сайд Дмитро Кулеба “Оросын гадаад хэргийн сайд Украины нутаг дэвсгэрээс илүү ихийг булаан эзлэх хүслээ илэрхийлсэн нь тус улс дипломат яриа хэлэлцээнээс татгалзаж, дайн терроризмд анхаарлаа хандуулж буйг харуулж байна. Оросууд ярилцахыг бус цус урсгахыг хүсэж байна” гэж мэдэгдсэн байна.
Дайн эхэлснээс хойш дөрвөн сар орчмын дараа Оросын зэвсэгт хүчин Донбассын бүс нутгийг бүрдүүлэгч хоёр мужийн нэг Луганскийг бүрэн эзлээд байгаа. Одоо Донбассын нөгөө нэг муж болох Донецкийг бүрэн хяналтдаа оруулах зорилготой ширүүн тулаан явуулж байна.
Эдгээрээс гадна Украины өмнөд хязгаарын Херсон, Запорожье мужуудын зарим хэсэг Оросын хяналтад ороод байгаа юм.
Лавровын ярилцлага нийтлэгдэхийн өмнөх өдөр Москвагийн эрх баригчид Украины эзлэгдсэн нутаг дэвсгэрт бүх нийтийн “хуурамч санал хураалт” зохион байгуулах замаар Оросын бүрэлдэхүүнд нэгтгэж магадгүй байгааг Цагаан ордноос анхааруулж байв.
Херсон, Запорожье мужуудад Оросын талаас томилсон удирдлагууд ийм санал хураалт зохион байгуулах санаа цухуйлгаж байгаа. Харин Кремль “нутгийн ард иргэд хувь заяагаа өөрсдөө шийдэх ёстой” гэсэн байр суурь илэрхийлж байна.
Эх сурвалж: Reuters