АНУ-ын Колорадо мужийн Аспен хотод 13 дахь жилдээ зохион байгуулагдаж буй Аспений Аюулгүй Байдлын Чуулганы үеэр Их Британийн гадаад тагнуулын алба MI6-ийн захирал Украины дайны талаар сүүлийн үед олж авсан мэдээллээ хуваалцжээ.
Дэлхий дахинд алдартай MI6 байгууллагын захирал Ричард Мүүр бол олон нийтийн арга хэмжээнд ховорхон оролцдог хүн юм.
Тэрбээр хэлсэн үгэндээ Украины дайныг “дэлхийн хоёрдугаар дайнаас хойш Европт гарсан хамгийн аймшигтай, увайгүй түрэмгийлэл” гэж дүгнэжээ.
Донбассын фронтод Оросуудын гаргасан сүүлийн үеийн амжилтыг Мүүр “өчүүхэн ахиц дэвшил” гэж тодорхойлоод энэ давшилтын үеэр нөөцөө шавхсан Оросын арми эмзэг байдалд байгааг хэлсэн байна.
“Сүүлийн хэдэн долоо хоногийн хугацаанд Оросын тал хүн хүч, материалын хомстолтой тулгарах нь улам бүр нэмэгдсэн гэж бид дүгнэж байгаа. Энэ нь тэдний байлдааны ажиллагаанд саатал үүсгэж, Украины талд сөрөг довтлох боломж олгож байна” гэж Мүүр ярьжээ.
Тэрбээр цааш нь хэлэхдээ “Бид маш эгзэгтэй цаг үед байна. Украинчуудын ялалтад туслах, ядаж давуу байр сууринаас хэлэлцээ хийх боломж гаргаж чадахгүй бол Хятадын төрийн тэргүүн Ши Жиньпин нөхцөл байдлыг олзоо шүүрэхээр хүлээж буй шонхор шиг анхааралтай ажиглаж байгаа” гэсэн юм.
Үүнээс гадна ОХУ-ын ерөнхийлөгч Владимир Путиний эрүүл мэнд муу байгааг харуулсан ямар нэг нотолгоо олдоогүй байгааг тэр чуулганд оролцогчдод мэдээлжээ.
Украинд дайн эхэлснээс хойших хугацаанд Европын орнууд Оросын 400 орчим нууц ажилтныг нутаг буцаасан нь Европ дахь тус улсын тагнуулын үйл ажиллагааны хүчин чадлыг тал хувиар бууруулсныг Мүүр баталсан байна.
Тэр бас Их Британийн талд ажиллах Оросын албан хүмүүсийг элсүүлэхэд MI6-ийн “хаалга үргэлж нээлттэй” байгааг энэ үеэр илэрхийлсэн юм.
MI6 одоо Хятад улсад хамгийн их хүч чармайлт гарган ажиллаж байгааг Мүүр энэ үеэр мэдээлсэн байна. Тэрбээр Хятадын коммунист дэглэмийг чөлөөт ертөнцийн хамгийн том өрсөлдөгч, аюул занал гэж харж байгаагаа илэрхийлсэн юм.
Путиний Украинд явуулж буй дайн Хятадын удирдлагын бодлого төлөвлөгөөнд ямар нөлөө үзүүлж буйг тодорхой хэлэхэд “хэтэрхий эрт” байгааг хэлсэн Мүүр
"Тайванийг эзлэн түрэмгийлэхийг оролдвол ямар үр дагавартайг Украины жишээн дээр Ши Жиньпинд ойлгуулах нь хамгийн чухал" болохыг онцолсон байна.
Эх сурвалж: BBC