Сүүлийн саруудад олон улс оронд тархаад буй сармагчны цэцэг өвчнийг дэлхийн хэмжээний эрүүл мэндийн хямралд тооцож, шуурхай арга хэмжээ авч эхлэх эсэхээ Дэлхийн Эрүүл Мэндийн Байгууллагын (ДЭМБ) мэргэжилтнүүд өнөөдөр хуралдаж шийдэхээр товложээ.
Хамгийн анх Африк тивд сармагчнаас илэрч байсан энэ өвчний вирус нь салхин цэцгийн вирустэй ойр төрлийнх юм. Гэхдээ салхин цэцэгтэй харьцуулахад сармагчны цэцэг өвчин хүндрэх эрсдэл багатайд тооцогддог.
Уг өвчний вирус хүнд халдварласан анхны тохиолдол 1970 онд Зайр улсад (одоогийн Бүгд Найрамдах Ардчилсан Конго Улс) илэрч байжээ. Тухайн үед есөн настай хүү уг өвчний вирусээр халдварлаж байсан юм.
Тэр үеэс хойш уг өвчний хүрээ Африк тивийн орнуудад ихэвчлэн хязгаарлагддаг байв. Харин энэ оны тавдугаар сараас хойш халдварын тархалт анх удаагаа тус тивээс гадна орших улс орнуудад хамгийн олон хүнийг хамраад байна.
Энэ удаагийн тархалтын төв цэг нь Европ тив, тохиолдлуудын ихэнх нь ижил хүйстэн эрчүүд байгаа юм.
Одоогоор дэлхийн 65 улсад 15,100 орчим тохиолдол батлагдаад байна.
Хамгийн сүүлд өчигдөр Тайланд улс сармагчны цэцэг өвчний халдварын анхны тохиолдлоо бүртгэжээ. Тус улсын аялал жуулчлалын төв Пукет аралд ирсэн Нигерийн 27 настай иргэн халдвар тээгч болсон байна.
Ази, Номхон далайн бүс нутгаас одоогоор Австралид 41, Шинэ Зеландад 2, Сингапурт 6, Энэтхэг, Тайваньд тус бүр нэг, Өмнөд Солонгост 2 халдварын тохиолдол бүртгэгдээд байгаа юм.
Эх сурвалж: Reuters
