Украины өмнөд бүсийн Херсон мужийг есдүгээр сард бүрэн чөлөөлж дуусах төлөвлөгөөтэй байгаагаа тус мужийн захирагчийн зөвлөх Сергей Хлань өчигдөр орон нутгийн телевизээр ярихдаа мэдэгджээ.
“Бид есдүгээр сард Херсон мужийг чөлөөлж дуусна. Тэр үед эзлэн түрэмгийлэгчдийн бүх төлөвлөгөө бүтэлгүйтсэн байх болно” гэж тэр хэлсэн байна.
Хлань “Тулааны талбарт эргэлт гарч эхэлснийг хэлмээр байна. Украины зэвсэгт хүчин сүүлийн үеийн байлдааны ажиллагаануудад давамгайлж эхэлсэн. Бид хамгаалах тактикаас сөрөг довтолгоонд шилжиж байна” гэж нэмж хэлжээ.
Херсон бол Украины дайн эхэлсний дараахан Оросын цэрэгт хамгийн түрүүнд эзлэгдсэн муж юм. Тус мужийг чөлөөлөх нь Украины талд бэлгэдлийн төдийгүй стратегийн өндөр ач холбогдолтой.
2014 онд эзлэгдсэн Крымийн хойгтой залгаа Херсон мужийг алдвал Оросын тал Хар тэнгисээс Украиныг тасалж, Молдовтой хуурай газраар хиллэх төлөвлөгөө нь бүтэхгүй болно.
Бас Өрнөдийн хамгийн орчин үеийн зэвсэг техникээр тоноглогдсон Украины армийн тулалдах чадвар, цаашдаа Орост эзлэгдсэн бүх нутаг дэвсгэрээ чөлөөлж чадах эсэхийг харуулах чухал ач холбогдолтой юм.
Сүүлийн өдрүүдэд Украины арми АНУ тэргүүтэй Өрнөдийн орнуудын нийлүүлсэн 80 км хүртэл алсын тусгалтай HIMARS залуурт пуужингийн системээр Орост эзлэгдсэн нутаг дэвсгэрийн гүнд байрлах зэвсгийн агуулах, цэргийн дэд бүтцүүдэд цохилт өгч эхлээд байгаа.
Эх сурвалж: AFP
