Гүүгл компанийн үүсгэн байгуулагчдын нэг Сергей Бриний эхнэртэй дэлхийн хамгийн баян хүн гэгддэг Илон Маск янаг амрагийн харилцаатай байсан тухай баримтыг The Wall Street Journal (WSJ) шүүхийн бичиг баримтаас олж мэдээлжээ.
Тэд өнгөрсөн оны намар дотно харилцаатай болж, үүнийг нь сүүлд мэдсэн Брин энэ оны нэгдүгээр сард эхнэрээсээ албан ёсоор салсан юм байна.
Технологийн салбарын тэрбумтнууд болох Маск, Брин нар олон жил үерхсэн найзууд юм.
Сүүлийн үед тэдний харилцаа эрс муудаж, Брин нь Маскийн үүсгэн байгуулсан компаниуд дахь хөрөнгө оруулалтаа буцааж татсаныг WSJ тодруулжээ.
Тухайлбал Брин 2008 онд анх Тесла компанид $500,000-ын хөрөнгө оруулж байсан юм байна.
Эх сурвалжуудын мэдээлснээр Сергей Брин, түүний эхнэр Никол Шанахан нар маргаан зөрчилтэй ч саяхныг хүртэл хамтдаа амьдарч байжээ.
Цар тахлын үеийн сэтгэлзүйн хямрал, стресс тэдний зөрчлийн гол шалтгаан болж байсан гэнэ. Яг энэ эгзэгтэй цаг үед буюу 2021 оны арванхоёрдугаар сард Маск, Шанахан нарын харилцаа эхэлсэн байна.
Тухайн үед Маск хоёр хүүхдийг нь төрүүлсэн найз бүсгүй, хөгжмийн продюсер Граймсаас салаад байжээ.
Ер нь сүүлийн үед Илон Маскийн хувийн амьдралыг тойрсон дуулиан тасрахгүй байгаа. Тэрбээр өөрийн байгуулсан Neuralink компанийн захирал эмэгтэйтэй дотно харилцаанд орж, ихэр хүүхэдтэй болсныг хэвлэлүүд саяхан олж илрүүлсэн юм.
Түүний 76 настай аав Эррол Маск дагавар охин нь байсан эмэгтэйгээс хоёр дахь хүүхдээ төрүүлсэн тухай саяхан Их Британийн хэвлэлд ярьж байв.
Тэр бас хүү шиг нь хүүхэдтэй болохыг хүссэн хүмүүс үрийн донор болох санал тавьдаг тухай энэ ярилцлагадаа өгүүлжээ.
Илон Маскийн хувьд дэлхийн томоохон сошиал платформ Твиттер компанийг худалдаж авах $44 тэрбумын саналаа саяхан цуцалсан бөгөөд үүний үр дүнд тэр шүүхэд дуудагдаад байгаа.
Твиттер компани түүнийг хүлээсэн үүргээ биелүүлээгүй хэмээн шүүхэд өгсөн юм.
Сергей Брин бол технологийн аварга компани Гүүглийг 1997 онд Ларри Пэйжтэй хамтран үүсгэн байгуулалцаж байсан хүн. Москвад төрсөн, Оросын жүүд гаралтай тэрбээр $99 тэрбумын хөрөнгөөрөө дэлхийн баячуудын долдугаарт жагсдаг байна.
Эх сурвалж: Business Insider
