Украинд явуулж буй дайных нь гол зорилго Киевийн засгийн газрыг түлхэн унагах болж өөрчлөгдсөн тухай ОХУ-ын гадаад хэргийн сайд Сергей Лавров мэдэгджээ.

“Иргэдийн эсрэг, түүхийн эсрэг бодлого, үйл ажиллагаатай дэглэмийн дарлалаас чөлөөлөгдөхөд нь Украины ард түмэнд бид туслах болно” гэж тэр Ням гарагт Египетийн нийслэл Кайр хотод хийсэн мэдэгдэлдээ өгүүлсэн байна. Тэр бас Орос, Украин хүмүүс ирээдүйд хамтдаа амьдрах ёстойг энэ үеэр хэлжээ.

Лавров өнгөрсөн долоо хоногт Африкийн орнуудаар хийх айлчлалаа Египетээс эхэлсэн бөгөөд үргэлжлүүлэн Этиоп, Уганда, Ардчилсан Конго улсуудад айлчлахдаа өөрийн улсын Украинд явуулж буй дайны зорилгыг тайлбарлаж, дэмжлэг авах зорилготой байгаа.

Кремлийн удирдлага анх Украинд цэргээ оруулахдаа тус улсыг нацизмаас ангижруулж (денацификация), цэрэг зэвсгийн хувьд аюулгүй болгох (демилитаризация) зорилго тавьж байсан юм.

Сүүлд энэ зорилгоо өөрчилж, зөвхөн Донбассын бүс нутгийг чөлөөлөх шинэ зорилт зарлаж байв.

Дөрөвдүгээр сард Энэтхэгийн телевизээр ярихдаа Сергей Лавров “Украинд төрийн эргэлт хийх төлөвлөгөө бидэнд байхгүй” гэж хэлж байжээ. Украинчууд хэний засаг захиргаан дор амьдрахаа өөрсдөө шийдэх эрхтэй гэж тэр энэ үеэр ярьсан байдаг.

Тэгвэл Лавров хэдхэн сарын өмнө илэрхийлсэн байр сууриа өөрчлөх болсон нь анхаарал татаж байна. Сүүлийн өдрүүдэд Оросын эрх баригчид Украинд явуулж буй дайныхаа зорилгыг өргөжүүлэх талаар дараалан мэдэгдээд байна.

Дөнгөж өнгөрсөн долоо хоногт ярихдаа Лавров дайны ажиллагаа Донбассын бүс нутгаар хязгаарлагдахгүй, өргөжих боломжтой хэмээн Украиныг зэр зэвсгээр хангаж буй Өрнөдийнхнийг сүрдүүлж байсан юм.

Өрнөдийн орнуудын илгээсэн орчин үеийн зэвсэг техникийг хүлээж авсан Украины арми одоо сөрөг довтолгоонд бэлдэж байгаа.

Киевийн эрх баригчид энэ онд багтаан Оросын цэрэгт эзлэгдсэн бүх газар нутгаа чөлөөлөх зорилгоо илэрхийлж байна.

Баасан гарагт Цагаан ордон Украинд илгээх $270 саяын багц тусламжаа зарласан юм. Дайн эхэлснээс хойш Байдены засаг захиргааны Украинд үзүүлсэн зэр зэвсгийн тусламжийн нийт хэмжээ $8.2 тэрбумд хүрээд байна.

Сүүлийн ээлжийн тусламжийн багцад Украины сөрөг довтолгоонд амин чухал хэрэгтэй байгаа HIMARS пуужингийн артиллерын систем дөрвөн ширхэг багтжээ. Үүнээс гадна 36,000 их бууны сум, 580 ширхэг Phoenix Ghost нисгэгчгүй онгоц зэрэг зэвсэг багтсан байна.

Эх сурвалж: Reuters