АНУ-аас Украинд нийлүүлсэн хамгийн хүчтэй зэвсэгт HIMARS пуужингийн систем тооцогдож байна.

Орчин үеийн өндөр технологид суурилсан уг зэвсгийн тусламжтайгаар Украины арми Оросын цэргийг нутаг дэвсгэрээсээ хөөн гаргах зорилготой байгаа. HIMARS нь алсын зайд GPS залууртай пуужингаар өндөр нарийвчлалтай цохилт өгөх чадвартай зэвсэг юм.

Өчигдөр буюу Даваа гарагт дайтагч талууд HIMARS зэвсэгтэй холбоотой өөр өөр мэдээлэл цацжээ.

Тухайлбал Украины тал уг зэвсгийг анх хүлээж авснаасаа хойш Оросын зэр зэвсгийн 50 орчим агуулахыг устгасан тухай мэдээлсэн юм.

Харин Оросын тал өчигдөр баруун Украины Хмельницкий орчимд байрладаг HIMARS-ийн сумны агуулахыг устгасан тухай мэдээлжээ.

Украины тал Оросын талаас өгсөн уг мэдээллийг няцаасан байна.

Үндэсний телевизийн сувгаар ярихдаа Украины батлан хамгаалахын сайд Олексий Резников “Энэ зэвсэг Оросын хангамжийн тээврийг тасалдуулж, дайсны байлдааны хүчийг сулруулж, манай зэвсэгт хүчнийг цохилтоос хамгаалах боломж олгож байна” гэж HIMARS-ийн ач холбогдлын талаар өгүүлжээ.

Тэр бас Украины арми Оросын хяналтад байгаа бүс нутгийн хэд хэдэн гүүрэнд оновчтой цохилт өгснийг мэдээлсэн юм.

Резников энэ талаар дэлгэрэнгүй мэдээлэл өгөөгүй ч Херсон мужийн голууд дээрх гурван гүүр өнгөрсөн долоо хоногт HIMARS-ийн цохилтод өртсөнийг Оросын томилсон захиргаанаас мэдээлж байв.

Украины арми саяхан гурван ширхэг Gepard агаараас хамгаалах зэвсгээр тоноглогдсон хуягт тэрэг хүлээж авсан тухай Резников мэдээлжээ. Ийм техник нийтдээ 15 ширхэгийг хүлээж авах юм байна.

Оросын батлан хамгаалах яам өмнө нь хэд хэдэн HIMARS устгаснаа мэдээлж байсан юм.

Дайны талбарт олон улсын сэтгүүлчид нэвтрэхэд хэцүү байгаагаас Украин, Оросын талуудын өгсөн тоо баримтыг гуравдагч эх үүсвэрээр баталгаажуулах боломжгүй байна.

Эх сурвалж: Aljazeera