Өчигдөр Брюссель хотод чуулсан Европын Холбооны гишүүн орнуудын эрчим хүчний сайд нар Оросын нийлүүлэлтээс хамаарлаа багасгах зорилгоор ирэх өвөл байгалийн хийн хэрэглээгээ дор бүрдээ 15 хувиар танах зөвшилцөлд хүрсэн байна.

Өчигдөр бас Оросын төрийн өмчит Газпром компани Умард Урсгал дамжуулах хоолойгоор Европын орнуудад нийлүүлдэг хийн хэмжээгээ нэлээд хэмжээгээр бууруулах болсноо мэдэгдсэн юм.

Тохиролцоо ёсоор Европын Холбооны гишүүн 27 орон энэ оны наймдугаар сараас ирэх оны гуравдугаар сар хүртэл хугацаанд байгалийн хийн хэрэглээгээ сайн дурын үндсэн дээр 15 хувиар бууруулах болж байна.

Уг тохиролцоог Германы эдийн засгийн сайд Роберт Хабек тус холбооны орнууд эв нэгдэлтэй байгаагаа Москвагийн эрх баригчдад харуулсан хэрэг гэж дүгнэжээ.

“Тэд биднийг хагаралдуулж чадахгүй” гэж тэр шийдвэр гарсны дараа мэдэгдсэн байна. Европын Холбооны хамгийн том эдийн засагтай Герман улс Оросын байгалийн хийн нийлүүлэлтээс гүнзгий хамааралтай байдаг. Хабек “Герман улс Оросын хийгээс хамааралтай нь үнэн. Энэ бол стратегийн алдаа байсан. Гэхдээ манай засгийн газар үүнийг засахаар ажиллаж байна” гэж хэлжээ. Өнгөрсөн онд Европын Холбооны ОХУ-аас авсан нийт хийн 40 хувийг Герман улс дангаараа хэрэглэж байсан юм.

Тохиролцоог ганцхан Унгар улс эсэргүүцсэн тухай Европын албаны эх сурвалж мэдээлжээ.

Герман улс тохиролцоонд нэгдсэнд талархаж байгаагаа илэрхийлсэн Францын эрчим хүчний шилжилтийн сайд Агнес Панньер-Рунаш “Манай аж үйлдвэрийн салбарууд хоорондоо хамаарал ихтэй. Хэрвээ Германы химийн салбар саатвал бүх Европын үйлдвэрүүд зогсох эрсдэлтэй” гэж хэлсэн байна.

Евро Комиссын ерөнхийлөгч Урсула фон дер Ляйен гишүүн орнуудын тохиролцоог талархан хүлээн авч буйгаа илэрхийлээд “Хийн нийлүүлэлтийг таслах Путиний сүрдүүлгийн эсрэг шийдвэртэй арга хэмжээ авч чадлаа” хэмээн сайшаажээ.

Одоо Европын Холбооны орнууд ирэх өвлөөс өмнө бусад эх үүсвэрээс хангалттай хэмжээний хий нөөцөлж авахаар идэвхийлэн ажиллаж байгаа юм.

Эх сурвалж: Reuters