Оросын хоёр дахь том газрын тос үйлдвэрлэгч Лукойл компанийн төлөөлөн удирдах зөвлөлийн дарга Равиль Маганов өчигдөр Москва хотын эмнэлгийн цонхоор унаж, амиа алдсан тухай ойрын эх сурвалжууд нь мэдээлжээ.
67 настай бизнесмэний үхлийн шалтгаан тун бүрхэг байгаа ба түүнийг сайн мэдэх хоёр хүн амиа хорлоогүй гэдэгт нь итгэлтэй байгаагаа илэрхийлсэн байна.
Лукойл компаниас гаргасан мэдэгдэлд Магановыг “хүнд өвчний улмаас нас барсан” гэжээ.
Түүний нас барсан шалтгааныг ОХУ-ын Мөрдөн Байцаах Товчоо шалгаж байгаа тухай Москвагийн цагдаагийн газар мэдээлсэн байна.
Энэ оны гуравдугаар сард Лукойл компанийн төлөөлөн удирдах зөвлөл Украины дайныг даруй зогсоохыг шаардсан уриалга гаргаж байсан юм. Маганов 1993 оноос хойш Лукойл компанид ажиллаж байжээ. Тэрбээр 2020 онд тус компанийн ТУЗ-ын дарга болсон юм. Түүний дүү Наиль Маганов нь Оросын дундаж хэмжээтэй газрын тос үйлдвэрлэгч Татнефтийн тэргүүнээр ажилладаг.
Маганов нь Лукойлыг үүсгэн байгуулагчдын нэг Вагит Алекперовын ойрын хүмүүсийн нэг байжээ. Украины дайн эхэлснээс хойш Оросын эрчим хүчний салбарын бизнесмэнүүд учир битүүлэг шалтгаанаар амиа алдсаар байна.
Оросын цэрэг Украинд халдан довтолсны дараахан Газпромын гүйцэтгэх захирал Александр Тюлаковын цогцос Санкт-Петербургийн ойролцоо гараажаас нь олдож байв.
Дөрөвдүгээр сард Оросын шингэрүүлсэн хийн Новатек компанийн захирал асан Сергей Протосеня эхнэр, охины хамт Испанид алагдаж байлаа.
Тавдугаар сард Лукойлын захирлуудын нэг асан Александр Субботины цогцос Москвагийн ойролцоо гэрээс нь олдож байжээ.
Тухайн сард бас Газпромбанкны дэд ерөнхийлөгч асан Владислав Адаев эхнэр, охины хамт Москва дахь гэртээ алагдсан байсныг Оросын хэвлэлүүд мэдээлж байв.
Эх сурвалж: Reuters
