Владивосток хотод эхэлсэн Дорнын Эдийн Засгийн Чуулганы нэгдсэн хуралдаанд өчигдөр үг хэлэхдээ ОХУ-ын ерөнхийлөгч Владимир Путин өнөөдрийн дэлхий дахинд тулгамдсан асуудлаар байр сууриа илэрхийлжээ.
Тэрбээр Украины дайны ач холбогдлын талаар хэлэхдээ уг дайн Оросыг сулруулах биш, харин улам хүчирхэгжүүлж байгаа гэсэн юм.
“Бид юуг ч алдаагүй, юуг ч алдахгүй гэдэгт би итгэлтэй байна. Хамгийн гол нь бид тусгаар тогтнолоо улам бэхжүүлж байгаа юм” гэж Путин хэлжээ.
Хоёрдугаар сарын 24-нд Оросын цэрэг Украины нутаг дэвсгэрт халдан довтолсны дараа АНУ тэргүүтэй өрнөдийн холбоотнууд ОХУ-ын эсрэг эдийн засгийн хориг арга хэмжээнүүдийг хэрэгжүүлж, Украины армийг орчин үеийн зэр зэвсгээр хангаж байгаа.
Үүний үр дүнд Оросын тал олон мянган цэрэг, зэвсэг техникээ алдаж, эдийн засаг нь хямралын ирмэг дээр тулж ирсэн гэж үздэг.
Харин Путин өчигдөр хэлэхдээ эдийн засгийн хориг Оросыг биш, Өрнөдийн орнуудыг илүү хохироож байгааг нотлон ярьсан байна.
“Цар тахал дэлхий дахиныг заналхийлсэн өөр нэг хямралаар солигдож байна. Өрнөдийн хоригийн халуурал, бусдыг өөрийн хүсэл зоригт захируулах гэсэн түрэмгий оролдлогыг би хэлж байна” гэж тэр хэлжээ.
Өрнөдийнхөн хоригоороо Оросыг ганцаардуулж чадахгүйг Путин энэ үеэр онцолсон байна. Тэрбээр энэ үгийг Мьянмар, Монгол, Армени, Хятадын төр, засгийн тэргүүнүүдтэй нэг тайзан дээр байхдаа хэлсэн юм.
Владивостокийн чуулганд Энэтхэг, Малайз, Вьетнам улсуудын удирдагчид видео холбоогоор оролцох болсныг тэр бас мэдэгджээ.
Өрнөдийнхөн нүүр буруулсан ч Ази, Номхон далайн бүс нутгийн орнуудтай харилцаа, хамтын ажиллагаагаа хөгжүүлэх боломж нээлттэйг Путин онцолсон байна.
Ингэхдээ тэр Оросын эрчим хүчний асар их нөөц баялгийг дэлхийн хаана ч нийлүүлэх боломжтойг дурдаад тус улсын байгалийн хий, газрын тосны бүтээгдэхүүнд үнийн дээд хязгаар тогтоох гэсэн Өрнөдийнхний оролдлогыг “тэнэглэл” гэж тодорхойлсон юм.
Энэ үеэр Путин байгалийн хийгээ Монголоор дамжуулан Хятадын зах зээлд гаргах тохиролцоонд бүрэн хүрснийг чуулганд оролцогчдод дуулгажээ.
Эх сурвалж: Reuters