Өчигдөр буюу аравдугаар сарын 5-ны өдөр Чеченийн нийслэл Грозный хот байгуулагдсаны 204 жилийн ой, бас тус Бүгд Найрамдах Улсын тэргүүн Рамзан Кадыровын төрсөн өдөр байв.

Энэ өдөр Кадыров 46 нас хүрсэн байна. Тэрбээр төрсөн өдрөө хурандаа генерал цолоор шагнуулснаа мэдээлжээ.

“Би нэг сайхан мэдээг та бүхэнтэй хуваалцмаар байна. ОХУ-ын ерөнхийлөгч намайг хурандаа генерал цолоор шагналаа. Зарлигийн дугаар 709. Владимир Владимирович өөрөө надад энэ мэдээг дуулгаж, баяр хүргэсэн” гэж Кадыров сошиал хуудсандаа бичсэн байна.

“Төрийн тэргүүн надтай утсаар ярихдаа Чеченийн ард түмэнд сайн сайхан, аз жаргал, амжилт бүтээлийг хүслээ. Их ажлынхаа хажуугаар ерөнхий командлагч маань манай бүс нутгийн чухал өдрүүдийг огт мартаж байгаагүй юм” гэж тэр цааш нь бичжээ.

Украинд цэргийн тусгай ажиллагаа явагдаж байгаатай холбоотойгоор Грозный хотод ямар нэг баяр наадмын арга хэмжээ зохион байгуулахгүйгээ Кадыров мэдэгдсэн байна.

Энэ оны гуравдугаар сард тэр дэслэгч генерал цол хүртэж байжээ.

Өчигдөр бас Кадыров дэлхийн хамгийн олон хоригоор шийтгүүлсэн хувь хүний батламжийг гардаж авсан байна. Оросын дээд амжилтын номын ерөнхий эрхлэгч Станислав Коненко түүнд батламжийг нь гардуулжээ.

Өнгөрсөн хугацаанд Кадыров нийтдээ 15 хориг арга хэмжээгээр шийтгүүлсэн байна. Тэрбээр энэ үзүүлэлтээрээ Умард Солонгосын Ким Жон Ун, Беларусийн ерөнхийлөгч Александр Лукашенко, Сирийн ерөнхийлөгч Башар Ассад нарыг ардаа орхижээ.

Эх сурвалж: ТАСС