2022 онд нийслэлийн ногоон байгууламжийг нэмэгдүүлэх, иргэдэд ая тухтай орчин бүрдүүлэхэд чиглэсэн бүтээн байгуулалт, тохижилтын ажлуудын талаар Нийслэлийн Засаг дарга Д.Сумъяабазар өнөөдөр мэдээлэл өглөө.
Тэрбээр “Нийслэлийн ногоон байгууламжийг нэмэгдүүлэх тал дээр бид онцгой анхаарч ажиллаж байгаа. Үүний тод жишээ бол Богдхан уулын Дугуй цагаан орчмыг тохижуулах ажлыг хуулийн дагуу эхлүүлсэн нь одоо 95 хувьтай үргэлжилж байна.
Нийслэл Улаанбаатар хотын эрхзүйн байдлын тухай хууль өнгөрсөн онд батлагдсаны дагуу, Засаг даргын эрх мэдэл хэмжээний хүрээнд энэ ажлыг нийслэл Улаанбаатар хотын иргэдийн 90 хувийн хүсэлтээр энэ ажил эхэлсэн.
Дугуй цагааны тохижилт арваннэгдүгээр сарын 15-н буюу өвлийн улирал эхлэхээс өмнө дуусгана гэдэг амлалтыг ажил ахалж явуулж буй хувийн хэвшлийнхэн өгч байгаа" гэв.
Үргэлжлүүлэн "Дараагийн нэг тохижилт бол Төв цэнгэлдэх хүрээлэнгийн тохижилтын ажил байсан. Сэтгэл гаргаж чадвал орчны тохижилтыг бүрэн хийх бололцоо бүрддэг гэдгийг бид үүгээр харуулахыг хичээсэн. Мөн туул голын эрэг дагуух тохижилтын ажил 90 хувийн гүйцэтгэлтэй байгаа бол Бага тэнгэр орчмын 3.8 га газрын тохижилт үргэлжилж байна.
Хотын даргын хувьд хэд хэдэн ажлыг хийсний дотор баахан самбар болчихсон байсныг буулгасан. Мөн хашаа хайлс, гараашнуудыг буулгах, явган замыг өргөтгөх, дугуйн замыг байгуулах ажлыг бид нэн тэргүүний зорилго болгон ажилласан. Энэ ажлыг ирэх жилүүдэд ч хийж хэрэгжүүлнэ" гэдгийг нэмж хэллээ.