Өнөөдөр буюу аравдугаар сарын 7-ны өдөр ОХУ-ын ерөнхийлөгч Владимир Путиний нас сүүдэр 70 хүрч байна.
Тэрбээр 1952 оны аравдугаар сарын 7-ны өдөр тухайн үеийн нэрээр Ленинград, одоогийн Санкт-Петербург хотод мэндэлж байжээ.
1975 онд Ленинградын их сургуулийн хуулийн салбарыг төгссөн Путин 1976 онд Ленинградад, 1979 онд Москвад КГБ-ын ажилтан бэлтгэх сургуулиудад элссэн байна.
Дараа нь тэр 1985 онд Зүүн Германы Дрезден хотод томилогдон ажиллаж байгаад 1990 онд эх орондоо буцжээ.
Путин эх орондоо буцаж ирснийхээ дараа Ленинград хотын захирагч Анатолий Собчакын албанд 1996 оныг хүртэл ажилласан юм.
Дараа нь тэр Москвад шилжиж, ОХУ-ын ерөнхийлөгчийн засаг захиргаанд янз бүрийн албан тушаал хашиж байжээ.
Улмаар 1999 оны наймдугаар сарын 9-нд ОХУ-ын ерөнхийлөгч Борис Ельцин түүнийг ерөнхий сайдад нэр дэвшүүлж байв.
Тухайн оныхоо сүүлээр Ельцин албан тушаалаасаа огцорч, ажил үүргээ Путиний гарт шилжүүлж байжээ.
2000 оны гуравдугаар сарын 26-нд болсон ОХУ-ын ерөнхийлөгчийн ээлжит бус сонгуулиар Путин 52.94 хувийн санал авч, тавдугаар сарын 7-нд тангараг өргөж байв.
Өнгөрсөн 22 жилийн хугацааны 2008-2012 онуудад тэр ерөнхий сайдын албыг хашиж, бусад бүх хугацаанд ОХУ-ын ерөнхийлөгчөөр ажиллажээ.
Эх сурвалж: ТАСС