АНУ-ын Ерөнхийлөгч Жо Байден CNN-ийн сэтгүүлч Жейк Тупперт онцгой ярилцлага өгчээ. Байден өнгөрсөн долоо хоногт "Цөмийн Армагеддон"-ын эрсдэл сүүлийн 60 жилийн хамгийн дээд түвшиндээ хүрсэн гэж мэдэгдээд, Оросын цөмийн зэвсэг хэрэглэнэ гэсэн заналхийлэл нь сүйрэлд хүргэж болзошгүй гэж ярилцлага өгөхдөө дурдаж байв. Гэхдээ ОХУ-ын Ерөнхийлөгч Владимир Путин Украинд цөмийн зэвсэг хэрэглэх шийдвэр гаргана гэдэгт Байден өөрөө ч итгэхгүй байна.

Байдены ярилцлагын онцлох ишлэлүүдээс хүргэж байна

Цөмийн зэвсэг ашиглах боломж болон АНУ-ын хариу үйл ажиллагааны талаар
"Би түүнийг тэгнэ гэж бодохгүй байна. Дэлхийн хамгийн том цөмийн гүрний удирдагч Украинд тактикийн цөмийн зэвсэг хэрэглэж болно гэж ярьж байгаа нь өөрөө туйлын хариуцлагагүй байдал гэж бодож байна" гэж Байден хэлэв.

Хэрэв Путин сүрдүүлгээ хэрэгжүүлбэл АНУ-ын авах хариу арга хэмжээ ямар байхыг тэрээр хэлэхээс татгалзсан байна. Түүний хэлснээр, ийм явдал гарсан тохиолдолд Пентагон янз бүрийн хувилбаруудыг урьдчилан боловсруулсан байна.

"Энэ талаар ярилцсан, гэхдээ би үүнээс илүүг хэлмээргүй байна. Бид юу хийх, юу хийхгүй гэдгээ ярих нь миний хувьд хариуцлагагүй хэрэг болно" гэж ерөнхийлөгч нэмж хэлэв.

"Та Пентагоноос энэ хувилбарыг хэрэгжүүлэхийг хүссэн үү" гэсэн асуултад тэрбээр "Пентагоноос асуух шаардлагагүй" гэж Байден хариулав.

Украиныг түрэмгийлэх Путины буруу тооцооны талаар
Байден ярилцлага өгөх үеэрээ Владимир Путиныг ухаалаг улстөрч гэж үзэж байгаа ч Украиныг эзлэн түрэмгийлэхдээ ноцтой буруу тооцоо хийсэн гэж хэлжээ.

"Би түүнийг маш их буруу тооцоолсон ухаалаг тоглогч гэж бодож байна" гэж тэр хэлэв.

Байден Путины Украинд тавьсан зорилгыг инээдтэй гэж нэрлэжээ.

"Чи түүний хэлсэн үгийг сонсоорой. Хэрэв та Украинд халдан довтлох шийдвэр гаргасны дараа түүний энэ талаар хэлсэн үгийг сонсвол тэр бүх орос хэлтэй хүмүүсийг нэгтгэсэн Орос Улсын удирдагч байх ёстой гэж ярьж байгааг нь сонсох болно. Би үүнийг зүгээр л үндэслэлгүй гэж тооцож байна" гэж тэр хэлэв.

Байдены хэлснээр, Путин Украинчууд Оросын цэргийн довтолгоо эхлэнгүүт дагаар орно гэж андуурсан байна. Түүний энэ төөрөгдлийг Оросын түрэмгийллийг ширүүн эсэргүүцсэн украинчууд өөрсдийн үйлдлээрээ үгүйсгэсэн.

Миний бодлоор, тэр түүнийг тэнд гар сунган тэвэрч угтана гэж бодсон. Тэр зүгээр л буруу тооцоолсон гэж бодож байна" гэж Байден хэлэв.

Путинтэй хэлэлцээр хийх боломжийн талаар
Байден ирэх арваннэгдүгээр сард Балид болох “Их 20”-ийн дээд хэмжээний уулзалтын үеэр Путинтэй уулзахаар төлөвлөөгүй гэдгээ мэдэгдсэн ч түүнтэй ярилцахыг үгүйсгээгүй.

"Би түүнтэй уулзах бодолгүй байна" гэж Байден хэлсэн ч "Гэхдээ жишээлбэл, тэр Их 20-ийн дээд хэмжээний уулзалтын үеэр над дээр ирээд сагсан бөмбөгчин Бритни Гринерийг суллах талаар ярилцмаар байна гэж хэлбэл би түүнтэй уулзах, ярилцах болно. Бүх зүйл нөхцөл байдлаас шалтгаална" гэж Байден дээрхи ярилцлагынхаа үеэр хэлжээ.

Эх сурвалж: Toim.mn