УИХ-ын чуулган үргэлжилж байна. 2023 оны улсын төсвийн төслийг хэлэлцэх үеэр УИХ-ын гишүүн М.Оюунчимэг цалин, тэтгэврийн тогтолцоо, Нийгмийн даатгалын сангийн алдагдлыг хэрхэн бууруулах талаар асуулт асуусан юм.
Тодруулбал “ҮСХ-ны мэдээллийг сонсож байхад НДС-ийн алдагдлыг бууруулж, орлогыг шийдэхгүй бол 2030 он гэхэд өнөөгийн үнэ цэнээр Оюутолгойн хэмжээний буюу 16 тэрбум ам.долларыг татан төвлөрүүлж байж ирээдүйд гарах алдагдлыг байхгүй болгоно гэсэн тооцоолол байна. Алдагдлыг яаж бууруулах вэ?” гэж асуув.
Түүний асуултад Засгийн газрын хэрэг эрхлэх газрын дарга Д.Амарбаясгалан дараах хариултыг өглөө.
“Нийгмийн даатгалын сан алдагдалтай явж байгаа. Алдагдлыг бууруулахаар үе шаттай арга хэмжээг авахаас аргагүй. Энэ хэвээр явбал 2027 он гэхэд өндөр эрсдэлтэй болох магадлалтай. Тэтгэвэр олгож байгаа, тогтоож байгаа байдал зэрэг эх үүсвэрийг уялдаатай, иж бүрэн тооцоолол хийж чадахгүй байгаагаас нөхцөл байдал энэ түвшинд хүрчээ гэж харж байгаа.
НДС-ийн алдагдлыг Засгийн газар бодлого хэрэгжүүлж арилгах боломж байгаа. Цалин, тэтгэврийн нэмэгдлийн талаар Засгийн газраас ирэх онд оруулж ирэх Нийгмийн даатгалын багц хуулиудад тодорхой оруулж ирэхээр зорьж буй. Итгэлцүүрийг бий болгож, тэтгэврийн зөрүүг арилгах, цаашдаа тэтгэврийг улс төрийн шийдвэрээр бус тухай жилийнхээ инфляцын түвшинтэй уялдуулж цалин, тэтгэвэр нэмэгддэг байх тогтолцоог бий болгохоор уг багц хуулийг оруулж ирэхээр зорьж байгаа” гэлээ.
