Баасан гарагт Турк улсын умард бүсийн нүүрсний уурхайд дэлбэрэлт болсны улмаас 41 уурхайчин амиа алдаж, 28 уурхайчин бэртсэн юм.

Хар тэнгисийн эрэгт оршдог уг уурхай төрийн өмчит компанид харьяалагддаг бөгөөд хохирогчдын ар гэрийнхэн эрх баригчдыг осолд буруутгаж байна.

Ослын үеэр уурхайд 110 хүн ажиллаж байсны бараг тал орчим нь 300-гаас дээш метрийн гүнд ажиллаж байжээ. Үүнээс өмнө 2014 онд Турк улсын баруун бүсийн уурхайд осол гарахад 301 уурхайчин амь үрэгдэж байв.

Бямба гарагт уурхайд очиж, нөхцөл байдалтай танилцсан Туркийн ерөнхийлөгч Эрдоганы хэлсэн үг олон хүнийг бухимдуулаад байна.

Тэрбээр аврагчидтай уулзах үеэрээ “Бид бол хувь заяаны төөргөө дагадаг хүмүүс. Ийм осол эндэгдэл үргэлж гарах болно. Бид үүнийг мэддэг байх ёстой” гэж хэлсэн юм.

Туркийн сөрөг хүчний удирдагчдын нэг Кемал Киликдароглу “Бид хэддүгээр зуунд амьдарч байгаа юм бэ? Яагаад уурхайн осол зөвхөн манай улсад гардаг юм бэ?” хэмээн Эрдоганы хэлсэн үгийг хурцаар шүүмжилжээ.

Туркийн Инженер, Архитектурчдын үйлдвэрчний эвлэлийн тэргүүн Эмин Корамаз уурхайчдыг хэдэн зуун метрийн гүнд ямар ч хяналт шалгалтгүй, аюултай нөхцөлд илгээсэн эрх баригчдыг шүүмжилсэн байна.

Урьдчилсан шалгалтаар уурхайд метан хий хуримтлагдаж, дэлбэрсэн гэх дүгнэлт гарчээ.

Олон хоногийн өмнөөс уурхайд хий үнэртэж эхэлснийг гэрчүүд баталж байгаа юм.

Хохирогчдын нэгний оршуулгын үеэр ар гэрийнх нь төлөөлөл эмэгтэй Эрдоганд хандан “Ерөнхийлөгчөө, миний ах 10-15 хоногийн өмнө уурхайд хий үнэртэж эхэлснийг ярьж байсан. Удахгүй дэлбэрч магадгүйг ч хэлж байлаа. Яагаад арга хэмжээ аваагүй юм бэ?” гэж асууж байв.

Эрдоган хэсэг чимээгүй байсны дараа “Хохирол амссанд тань харамсаж байна. Аллах зовлонг давах тэвчээр хайрлах болтугай” гэж хариулсныг хэвлэлүүд мэдээлжээ.

Эх сурвалж: BBC