Даваа гарагийн өглөө эрт Украины нийслэл Киев хотын төв хэсэгт Оросын арми камиказе дроноор цохилт өгсөн байна.
“Нийслэл хот камиказе дроны халдлагад өртлөө. Оросууд үүнийг өөрсдөд нь тус болно гэж бодож байгаа байх. Үнэн хэрэгтээ тэд аргаа барсныг энэ явдал харуулж байна. Бидэнд аль болох хурдан агаараас хамгаалах систем хэрэгтэй байна. Агаарын орон зайгаа хамгаалж, дайсныг устгах илүү олон зэвсэг хэрэгтэй” гэж Украины ерөнхийлөгчийн тамгын газрын дарга Андрей Ермак сошиал хуудсандаа бичжээ.
Яг нэг долоо хоногийн өмнө Киев болон Украины бусад олон хот Оросын пуужингийн цохилтод нэрвэгдэж байсан юм.
Довтолгооны үеэр алагдсан иргэдийн дотор гэрлээд удаагүй хос залуус байсныг Киевийн захирагч Виталий Кличко мэдээлжээ.
“Анхны хүүхдээ хүлээж байсан хос залуус алагдлаа. Эмэгтэй нь зургаан сартай жирэмсэн байсан юм” гэж тэр сошиал хуудсандаа мэдээлжээ.
Даваа гарагт бас Украины зүүн бүсийн Сумы хот руу Оросын арми пуужингийн цохилт өгөх үеэр гурван иргэн амь үрэгдэж, хэд хэдэн хүн шархадсан тухай орон нутгийн удирдлага мэдээлсэн байна.
“Өглөөний 5:20 цагт Оросын гурван пуужин иргэний дэд бүтцийн байгууламжуудыг онолоо. Гурван хүн амь үрэгдэж, есөн хүн шархадсан нь тогтоогдоод байна. Нуранги дороос хүмүүсийг гаргах ажил үргэлжилж байна” гэж орон нутгийн захирагч Дмитро Живицкий мэдээлжээ.
Украины эрчим хүчний дэд бүтцүүдийг устгах довтолгоонд Иранд үйлдвэрлэсэн дронуудыг Оросын тал ашиглаж байгааг ерөнхийлөгч Володимир Зеленский өнгөрсөн долоо хоногт мэдээлж байв.
Харин Тегераны эрх баригчид ОХУ-ын зэвсэгт хүчинд дрон нийлүүлснээ үгүйсгэсээр байна.
Долоо хоногийн өмнө Оросын тал Украины олон хотод пуужингийн цохилт өгөх үеэр 19 хүн алагдаж, 105 хүн шархадсан юм.
Маргааш нь Оросын тал довтолгоогоо үргэлжлүүлсэн ч хамрах хүрээний хувьд эрс багассан байна.
Уг довтолгоогоо Крымийн гүүрийг дэлбэлсний хариу арга хэмжээ гэж ОХУ-ын ерөнхийлөгч Владимир Путин мэдэгдэж байв.
Баасан гарагт тэрбээр довтолгоо зорилгодоо хүрсэн тул Украинд дахин ийм хэмжээний цохилт өгөх шаардлагагүй болсон тухай ярьж байжээ.
Тухайн өдөр АНУ-ын засаг захиргаа Украинд үзүүлэх $725 саяын тусламжийн багцаа зарласан юм. Үүнд HIMARS системийн пуужингууд багтсан байна. Ингэснээр АНУ-аас Украинд үзүүлсэн зэр зэвсгийн нийт тусламжийн хэмжээ $17.6 тэрбумд хүрсэн юм.
Эх сурвалж: AFP