АНУ-ын ерөнхийлөгч Жо Байден ирэх сард 80 нас хүрэх гэж байна. 2024 оны сонгуульд түүнийг дахин өрсөлдөх эсэх, хоёр дахь удаагаа ерөнхийлөгчөөр ажиллаж чадах эсэх асуудал одоо Америкчуудын санааг зовоож байгаа.
Тэгвэл Ням гарагт цацагдсан MSNBC сувгийн ярилцлагадаа Байден энэ асуудлыг хөнджээ.
“Хэний ч, тэр дундаа миний насны талаар санаа зовох нь зүй ёсны хэрэг гэж би бодож байна. Ингэх бүрэн эрхтэй. Миний бодлоор шийдвэр гаргах хамгийн сайн арга бол намайг ажиглах юм. Би удааширч байна уу? Өмнөх хурдаараа явж байна уу?” гэж тэр ярьсан байна.
Байден бас маргааш өвдөж, эсвэл үхэж болох ч яг өнөөдөр эрүүл мэндийн хувьд маш сайн байгаагаа хэлжээ.
Өөрөөр хэлбэл тэр 2024 онд дахин ерөнхийлөгчийн сонгуульд нэрээ дэвшүүлэх боломжийг үгүйсгээгүй юм.
“Миний эрч хүч, ажиллах чадварыг хүмүүс хараад үнэлэх ёстой. Хэрвээ би чадаж байвал сайн хэрэг. Хэрвээ чадахгүй байвал тэд бас хэлэх ёстой” гэж Байден энэ үеэр ярьжээ.
Өмнөх ерөнхийлөгч Дональд Трамп 2024 онд дахин өрсөлдөх бодолтойгоо нуухгүй байгаа. Түүнийг шийдвэрээ ирэх сард болох конгрессын дунд хугацааны сонгуулийн дараа зарлана гэсэн хүлээлттэй байна.
Гэхдээ саяхан Америкчуудын дунд явуулсан санал асуулгаар иргэдийн олонх нь Трамп, Байден хоёрыг дахин ерөнхийлөгчөөр ажиллахад “хэтэрхий хөгшиднө” гэж дүгнэжээ.
Эх сурвалж: Business Insider
