БНХАУ-ын хөрөнгө оруулагчдыг залилсан хэргийн талаар Хууль зүй, дотоод хэргийн сайд Х.Нямбаатар танилцууллаа.

Тэрбээр "Манай улсын иргэн Б, К нар БНХАУ-ын иргэн В-ээс Замын-Үүдийн чөлөөт бүсийн хөрөнгө оруулалтад хамтран ажиллах нэрээр 5.3 тэрбум төгрөг, Ц, К нар нь Өмнөговь аймгийн Ханбогд сумын нутагт байрлах Гашуунсухайт, Ганцмод боомтын хооронд газар доогуур нүүрс тээвэрлэх битүү туузан дамжуургын ажилд хамтран ажиллах хөрөнгө оруулалт гэж 22 тэрбум төгрөг, нийт 27.3 тэрбум төгрөгийг авч залилсан.

Тухайн хэрэг анхан шатны шүүх дээр шийдэгдээгүй байгаа. Тус хэргийг шүүхэд шилжүүлснээс хойш цар тахал гээд нэг, өмгөөлөгч хүсэлт гаргаж дөрөв, шаардлагатай гэрч шүүх хуралд ирээгүй гэдэг шалтгаанаар нэг, нийт зургаан удаа шүүх хурал хойшлогдоод байна" гэлээ.

Мөн БНХАУ-ын бас нэг иргэнийг хохироосон хэргийн талаар Хууль зүй, дотоод хэргийн сайд мэдээлэл өгөв. Гадаадын хөрөнгө оруулалттай Х гэдэг ХХК-ийн тав, таван хувийн хувьцаа эзэмшигч С, Г нар бүлэглэн Х гэдэг компанийн ерөнхий захирал БНХАУ-ын иргэн В-ээс баталгаат гарын үсэг зурах тамга, тэмдгийн загварыг залилан авч, дансны гүйлгээ хийх эрх нээлгэжээ.

Улмаар 111.5 мянган ам.доллар, 283.9 сая төгрөгийг хувийн дансаар шилжүүлэн авч, хувьдаа завшсан байна. 2017 онд 315 мянган ам.долларыг тус компаниас ногдол ашиг хуваарилав гэсэн утгатайгаар нөхөр Г-ийн дансанд шилжүүлэн авч мөнгө угаажээ. Энэ хэрэг Сүхбаатар дүүргийн анхан шатны шүүхэд хянагдаж, өнөөдрийг хүртэл шийдвэрлэгдээгүй байна.