Америкийн иргэний хөдөлгөөний нэрт зүтгэлтэн Малкольм Икс (англиар Malcolm X) 1965 онд бусдын гарт алагдахад хоёр хүн шийтгүүлж байсан юм.
Гэвч олон жилийн дараа шүүх тэднийг гэм буруугүй гэж үзээд цагаатгажээ. Цагаатгагдсан Мухаммад Азиз, Халил Ислам нарын хохирлыг барагдуулахад Нью-Йорк хот, Нью-Йорк мужийн захиргаа нийтдээ $36 саяыг төлөхөөр болсныг шүүх өчигдөр зарлажээ.
Хоёр хохирогчийн нэг 84 настай Азиз 20 орчим жил шоронд хоригдоод 1980-аад оны дундуур суллагдсан ч өнгөрсөн оны арваннэгдүгээр сард л цагаатгагдаж байв. Нөгөө нэг хохирогч болох Ислам нь бас 20 орчим жил хоригдсон ч амьддаа цагаатгагдаж чадалгүй 2009 онд 74 насандаа таалал төгсөж байжээ.
Азиз болон Исламын үр хүүхдүүд арьс өнгөөр ялгаварлах үзэл шүүхийн системд нөлөөлсний улмаас хилс хэрэгт шийтгүүлсэн гэх үндэслэлээр тус тусын хохирол болох $40 саяыг шүүхээс нэхэмжилж байв.
Нью-Йорк хотын захиргаа Азиз, Ислам нарын хохиролд нийтэд нь $26 саяыг, Нью-Йорк мужийн захиргаа хохирогч тус бүрд $5 сая, нийт $10 саяыг төлөх шийдвэр гаргажээ.
1965 онд 39 настай Малкольм Икс нэгэн арга хэмжээнд үг хэлэхээр ирэх үедээ Нью-Йоркийн Харлем дүүрэгт буудуулж алагдсан юм. Түүний аллагад “Nation of Islam” исламын шашинт африк гаралтай иргэдийн экстремист байгууллагын гурван гишүүн сэжиглэгдэж байжээ.
Гурван сэжигтний хоёр нь сая цагаатгагдсан Азиз, Ислам нар байсан юм. Гурав дахь сэжигтэн Абдул Халим 2010 онд шоронгоос суллагдаж байжээ. Одоо 81 настай тэрбээр аллага үйлдсэнээ хүлээж, нөгөө хоёрыгоо гэм буруугүй гэж мэдүүлсэн байдаг.
Эх сурвалж: Aljazeera
