АНУ болон Нидерланд улс Чех улсын зэвсэглэлд байгаа Зөвлөлтийн үед зохион бүтээсэн 90 ширхэг T-72 танкийг шинэчлэх зардлыг гаргахаар болсон байна.
Ингэж бүрэн шинэчилсэн танкуудыг энэ оны сүүлээр Украин улсын засгийн газарт нийлүүлэхээр төлөвлөжээ.
Пентагон 45 танкийг шинэчлэх зардлыг гаргах бол үлдсэн 45 танкийн зардлыг Нидерланд улс гаргахаар болсон байна.
Хуучин танкуудыг шинэ дуран, харилцаа холбооны төхөөрөмж, хуяг зэргээр шинэчилж, “техникийн хувьд хамгийн шилдэг тулааны танк” болгон хувиргахыг Пентагоны хэвлэлийн төлөөлөгчийн орлогч Сабрина Сингх өнгөрсөн Баасан гарагт болсон хэвлэлийн хурлын үеэр мэдээлжээ.
Энэ мэдэгдлийн дараа Украины ерөнхийлөгч Володимир Зеленский “маш их хэрэгцээтэй байгаа” зэвсгээр туслах болсон орнуудад талархал илэрхийлсэн байна.
We are sincerely grateful to 🇳🇱, 🇺🇸 and 🇨🇿 for providing significant and much-needed support – 90 T-72 tanks. The Armed Forces of Ukraine are pushing forward and need this equipment. We value the help of partners. Together we stand for protection of freedom & democracy!
— Володимир Зеленський (@ZelenskyyUa) November 5, 2022
АНУ анх удаагаа Зөвлөлтийн хуучин танкуудыг шинэчлэх ажлыг санхүүжүүлж буйг Сингх тайлбарлажээ.
Өмнө нь Украины эрх баригчид АНУ-ын Abrams, Германы Leopard зэрэг шинэ танк илгээхийг Өрнөдийн орнуудаас хүсэж байсан юм.
Гэвч ийм танкууд илгээх нь зардал өндөртэй, бас украины мэргэжилтнүүдэд зааж сургахад хугацаа орох тул хуучин танил T-72 танкийг сайжруулахаар болсныг Сингх мэдээлжээ.
Танк шинэчлэх санхүүжилт нь АНУ-ын засаг захиргаанаас хамгийн сүүлд Украинд үзүүлэхээр болсон $400 саяын зэр зэвсгийн тусламжийн багцын нэг хэсэг юм байна.
Уг багцад Украинд чухал шаардлагатай байгаа American Hawk агаарын довтолгооноос хамгаалах пуужингийн систем багтжээ.
Эх сурвалж: Business Insider