Дэлхийн томоохон сошиал платформ Твиттерийг худалдаж аваад удаагүй байгаа тэрбумтан Илон Маск бусдын нэрийг ашигласан хаягуудыг бүрмөсөн устгах төлөвлөгөөтэй байгаагаа мэдэгджээ.
Ням гарагийн орой тэр твиттер хуудсандаа бичихдээ “элэглэх зорилготойгоо тодорхой илэрхийлээгүй бол бусдын нэрийг ашигласан хаягуудыг бүрмөсөн устгах болно. Өмнө нь бид устгахаасаа өмнө анхааруулдаг байсан. Харин одоо бид хаягийн баталгаажуулалтыг өргөн хүрээнд нэвтрүүлэх тул анхааруулалгүй устгана” гэсэн байна.
Ингэснээр Твиттерийн баталгаажуулалтын “хөх тэмдэг” авах нөхцөл бүрдэхийг Маск бас тайлбарлажээ.
Тэрбээр Твиттерийг худалдаж авсныхаа дараа хамгийн түрүүнд “хөх тэмдэг” ашиглах эрхийг сарын $8-ийн хураамжтай болгохоор ажиллаж эхэлсэн юм. Уг тэмдгийг өмнө нь улс төрчид, алдартнууд, хэвлэл мэдээллийнхэн зэрэг олны танил хүмүүс хүсэлт гаргаад үнэ төлбөргүй авч болдог байв.
Түүний шинэ санаа маш олон эсэргүүцэл, шүүмжлэлтэй тулгараад байгаа. Бямба гарагт Твиттер сарын хураамжтай үйлчилгээний нөхцөлөө өөрийн iOS-ийн аппликэйшнд нэвтрүүлсэн юм. Гэхдээ зах зээлд бүрэн нэвтрүүлэх ажлыг АНУ-ын конгрессын сонгуулийн дараа эхлүүлэхээр хойшлуулсан гэх мэдээлэл ирж байна.
Сарын хураамжийг шүүмжилсэн зарим хүмүүс өчигдөр өөрийн хаягийг Илон Маскийн нэрээр сольж, эсэргүүцлээ илэрхийлэхийн хажуугаар шинэ журам хэрхэн хэрэгжихийг шалгажээ.
Тухайлбал Америкийн комедиан Кэти Гриффин нэрээ ингэж өөрчилсний дараа Твиттер компани түүний 2 сая дагагчтай хаягийг цуцалсан байна.
BREAKING: @KathyGriffin has been permanently suspended from Twitter for impersonating @ElonMusk pic.twitter.com/ust86DZHKj
— Benny Johnson (@bennyjohnson) November 6, 2022
Эх сурвалж: Reuters
