Мягмар гарагт АНУ-д эхэлсэн дунд хугацааны (завсрын ч гэдэг) конгрессын сонгуулийн саналыг тоолох ажиллагаа үргэлжилж байна.
Энэ удаагийн сонгуулиар Бүгд Найрамдахчууд үнэмлэхүй ялалт байгуулах “улаан давлагаа” үүсэх урьдчилсан таамаг яригдаж байсан ч ийм эргэлт болохгүй нь тодорхой болжээ. Бүгд Найрамдах намыг улаан, Ардчилсан Намыг хөх өнгөөр илэрхийлдэг.
Өчигдрийн байдлаар конгрессын доод танхим болох төлөөлөгчдийн танхимд Бүгд Найрамдах нам олонх болох нь бараг тодорхой болоод байна. Харин дээд танхим буюу Сенатад Ардчилсан Нам хяналтаа тогтоож болзошгүй болжээ.
Төлөөлөгчдийн танхимын 435 суудлын 218-ыг авсан нам олонх болдог. Тэгвэл одоогийн байдлаар Бүгд Найрамдах нам 222 суудал авах магадлалтай болжээ.
Харин 100 суудалтай Сенатын танхимд Бүгд Найрамдах нам хяналтаа тогтоохын тулд 51 суудал хэрэгтэй бол Ардчилсан намд 50 суудал хэрэгтэй. Учир нь Сенатыг даргалдаг Ардчилсан намын дэд ерөнхийлөгч Камала Харрисд нэг саналын эрх байдаг юм.
Одоогоор Сенатын хувь заяаг шийдэх Флорида, Аризона, Жоржиа мужийн гурван тойрогт нэр дэвшигчдийн саналын тоо маш ойрхон явж байна.
Эдгээрээс Флоридад Бүгд Найрамдах нам, Аризонад Ардчилсан намын нэр дэвшигч сонгогдох магадлал өндөр болжээ. Харин Жоржиа мужид 50 хувийн саналын босгыг давах нэр дэвшигч гаралгүй, арван хоёрдугаар сарын 6-нд хоёр дахь шатны санал хураалт явуулж болзошгүй байна.
Санал хураалт хаагдсаны дараа болсон хэвлэлийн хурлын үеэр АНУ-ын ерөнхийлөгч Жо Байден таамаглаж байсан шиг “улаан давлагаа” болоогүйд баяртай байгаагаа илэрхийлээд “Ардчилагчдад сайхан шөнө болж байна!” гэж мэдэгдсэн юм.
Гэхдээ тэр бас зарим мужуудад нам нь ялагдал хүлээснийг хүлээн зөвшөөрчээ. Хэрвээ конгрессын хоёр танхимд Бүгд Найрамдахчууд хяналтаа тогтоовол Байдены мөрийн хөтөлбөр хэрэгжихэд хүнд болох юм.
2024 оны ерөнхийлөгчийн сонгуульд нэрээ дэвшүүлэх эсэх талаар сэтгүүлчид асуухад Байден талархлын баярыг гэргийтэйгээ тэмдэглэж, түр завсарласны дараа ирэх оны эхээр шийдвэрээ зарлах бодолтой байгаагаа хэлсэн байна.
Бүгд Найрамдах намаас 2024 онд дахин нэр дэвших магадлалтай байгаа экс ерөнхийлөгч Дональд Трамп энэ сонгуулийн дараа буюу ирэх долоо хоногт шийдвэрээ зарлахаа мэдэгдсэн юм.
Эх сурвалж: BBC
