Мягмар гарагт АНУ-д зохион байгуулагддаг Powerball сугалаанд нэг хүн $2.04 тэрбумын шагнал хожсон нь тус улсын төдийгүй дэлхийн сугалааны түүхэнд хонжворын дээд амжилтыг тогтоосон юм.

Азтанд сугалааны тасалбар зарсан Калифорни мужийн Алтадена хотын нэг дэлгүүрийн эзэн үүнийхээ төлөө сугалааг зохион байгуулагчдаас $1 саяын урамшуулал авахаар болжээ.

Дэлгүүрийн эзэн Жозеф Чахаед нь 1980-аад оны үед Сири улсаас АНУ-д цагаачилж ирсэн хүн бөгөөд 10 ач зээтэй өвөө юм байна.

Тэрбээр саятан болсондоо баяртай байгаа ч өглөө бүрийн 06:00 цагт дэлгүүрээ нээдэг ажлаа үргэлжлүүлэн хийх бодолтой байгаагаа ярьжээ.

Чахаед хэн азтан болсныг мэдэхгүй ч орон нутгийн оршин суугч байгаасай гэж хүсэж байгаагаа бас хэлсэн байна.

Урамшууллын мөнгөө тэр хүүхдүүдийнхээ сайн сайхны төлөө зарцуулах төлөвлөгөөтэй гэнэ.

“Миний нэг хүү хоёр сарын дараа аав болох гэж байгаа. Шинэ ачтай болох гэж байгаадаа би тун баяртай байна. Би цаашдаа долоо хоногийн долоон өдөр ажилладгаараа ажиллана” гэж Чахаед хэвлэлд ярьжээ.

Powerball сугалааны тасалбар $2-ын үнэтэй байдаг.

Мягмар гарагт тодорсон азтан хонжвороо нэг дор шууд авахыг хүсвэл $997.6 саяыг бэлнээр авах юм. Эсвэл нийт $2.04 тэрбумаа 29 жилийн турш хувааж авах боломжтой.

Азтан болсон хүмүүс ихэвчлэн эхний хувилбарыг сонгодог байна.

Эх сурвалж: BBC