Индонезын Бали аралд өнөөдөр эхлэх Их 20-ын бүлгийн чуулганы өмнөх өдөр Америк, Хятадын төрийн тэргүүн нар анх удаа нүүр тулан уулзлаа.
АНУ-ын ерөнхийлөгч Жо Байден, БНХАУ-ын дарга Ши Жиньпин нар Даваа гарагийн өглөө гурван цаг гаруй хугацаанд хаалттай хаалганы цаана уулзаж, ярилцсан байна.
Уулзалтын дараа Цагаан ордноос гаргасан мэдэгдэлд өгүүлснээр хоёр удирдагч Украинд цөмийн зэвсэг хэрэглэхийг эсэргүүцсэн байр суурин дээр санал нэгджээ.
Талууд “Цөмийн дайн хэзээ ч гарах ёсгүй, гарсан тохиолдолд хэн ч ялах боломжгүй”, “Украинд цөмийн зэвсэг хэрэглэх, хэрэглэхээр сүрдүүлэхийг эсэргүүцэж байна” гэсэн байр суурь харилцан илэрхийлснийг дээрх мэдэгдэлд өгүүлсэн байна.
Харин Хятадын гадаад хэргийн яамнаас гаргасан уулзалтын талаар мэдэгдэлд энэ талаар нэлээд бүрхэг мэдээлжээ.
Тухайлбал Украины хэрэг явдалд Хятад улс маш их санаа зовж байгаа, том гүрнүүдийн хооронд сөргөлдөөн гарахаас зайлсхийх хэрэгтэйг онцолсон тухай уг мэдэгдэлд дурдсан байна.
Мөн ОХУ-ыг Украинаас цэргээ гаргахыг шууд уриалаагүй ч яриа хэлэлцээ эхлүүлэхийг уриалжээ.
Америк, Хятадын төрийн тэргүүнүүдийн хэлэлцсэн бас нэг чухал сэдэв нь Тайванийн асуудал байв.
Талууд энэ асуудлаар өөр өөрийн өмнөх байр суурийг давтан илэрхийлжээ.
Тухайлбал Хятад улс Тайванийн тусгаар тогтнолыг хэрхэвч зөвшөөрөхгүйгээ илэрхийлсэн бол Хятад улсын “хүч хэрэглэхээр сүрдүүлсэн, түрэмгий үйлдэл” өсөн нэмэгдэж буйг АНУ шүүмжилсэн байна.
Уулзалтын дараа болсон хэвлэлийн хурлын үеэр Жо Байден хоёр удирдагч “шинэ хүйтэн дайн эхлүүлэх шаардлагагүй” болохыг бие биедээ илэн далангүй, ойлгомжтой илэрхийлсэн тухай мэдээлжээ.
Сүүлийн үед АНУ-ын албаныхан Хятад улс Тайвань арлыг ойрын үед хүч хэрэглэн эзлэхээр төлөвлөж буй тухай анхааруулах болсон.
Тэгвэл Байден өчигдрийн уулзалтын дараа “Хятадын талаас Тайваньд халдан довтлох ямар нэг ноцтой оролдлого гарахгүй гэж би бодож байна” гэж мэдэгджээ.
Эх сурвалж: Business Insider