АНУ-ын иргэн, сагсан бөмбөгийн эмэгтэй од Бритни Грайнер мансууруулах бодис биедээ авч явсан хэргээр Оросын шүүхээс есөн жилийн хорих ял сонссон билээ.
Тэрбээр энэ оны хоёрдугаар сард Украины дайн эхлэхийн өмнөхөн WNBA лигийн улирлын тэмцээний завсраар Оросын клубт тоглох зорилготой Москвад ирээд саатуулагдсан юм. Түүний ачаанаас Оросын гаалийнхан мансууруулах төрлийн бодис илрүүлсэн гэдэг.
Тэгвэл Грайнер оногдсон ялаа Оросын алслагдсан бүс нутаг дахь шоронд эдэлж эхэлснийг өмгөөлөгч нь өчигдөр мэдээлжээ. Өнгөрсөн сард тэр шүүхийн шийдвэрийг давж заалдсан ч үр дүнд хүрээгүй юм.
Түүнийг Москвагаас зүүн зүгт 350 км зайтай оршдог Мордовын засан хүмүүжүүлэх газарт шилжүүлсэн байна.
“Бритнигийн бие сайн, шинэ орчиндоо дасах сэтгэл зүйн бэлтгэлтэй байгаа” гэж Грайнерын өмгөөлөгч ярьжээ.
Бритни Грайнер нь WNBA-гийн Phoenix Mercury багийн болон бүх оддын багийн төвийн тоглогч, Олимпын хошой алтан медальтай тамирчин юм.
АНУ-ын засаг захиргаа Грайнерыг суллуулахаар дипломат шугамаар удаан хугацаанд хөөцөлдсөн ч үр дүнд хүрээгүй. Украины дайны улмаас хоёр улсын харилцаа эрс муудсан нь түүнд Оросын шүүхээс хатуу шийтгэл онооход нөлөөлсөн гэж ажиглагчид үздэг. Тэрбээр өвчнөө намдаахын тулд эмчийн заавраар каннабис хэрэглэдэг байснаа шүүх хурлын үеэр хүлээн зөвшөөрсөн юм.
Эх сурвалж: Associated Press
