Оросын арми цөмийн цэнэгт хошуу тээвэрлэх зориулалттай далавчит пуужингуудаа Украины агаарын довтолгооноос хамгаалах зэвсгийн нөөцийг багасгах зорилгоор ашиглаж буй тухай АНУ-ын зэвсэгт хүчний эх сурвалж өчигдөр мэдээлжээ.
Оросууд цэнэгт хошууг нь салгасан далавчит пуужингуудыг Украины нутаг руу харваж байж болзошгүйг Их Британийн тагнуулын алба өмнө нь мэдээлсэн юм. Тэгвэл үүнийг АНУ-ын албаны эх сурвалж өчигдөр анх удаа баталсан байна.
Дээрх мэдээлэлд дурдсанаар Оросын тал 1980-аад онд үйлдвэрлэгдсэн далавчит пуужингуудыг цэнэгт хошуугүйгээр харваж байгаа гэнэ.
Цэнэгт хошууны оронд пуужинд хүндрүүлэгч байрлуулсан нь байнд кинетик цохилт өгөхөөс гадна пуужингийн зарцуулагдаагүй үлдсэн түлшийг шатаах замаар хохирол учруулах зорилготой гэнэ.
Украины агаараас хамгаалах систем ийм “хоосон” пуужингуудыг устгаснаар сумны нөөц нь багасаж, Оросын талд боломж олгохоор тооцоолсон гэж Британийн мэргэжилтнүүд дүгнэсэн байна.
Энэ талаар сэтгүүлчийн асуултад хариулахдаа Пентагоны эх сурвалж “Украины талын ашиглаж буй агаарын довтолгооноос хамгаалах системийн үр нөлөөг бууруулах зорилгоор ийм арга хэрэглэж байгаа нь тодорхой” гэж хариулжээ.
Ийм шалтгаанаар сүүлийн үед АНУ тэргүүтэй холбоотнууд Украины агаарын довтолгооноос хамгаалах чадварыг сайжруулахад анхаарлаа хандуулах болсон юм. Тухайлбал Patriot агаарын довтолгооноос хамгаалах системийг Украинд нийлүүлэх талаар судалж байгааг Пентагоны өөр нэг эх сурвалж өчигдөр мэдээлжээ.
Эх сурвалж: Reuters
