Зүүнбаян-Ханги чиглэлийн төмөр зам сая ашиглалтад орлоо. Экспорт, импортын шинэ гарц болсон уг төмөр зам найман сарын дотор бүрэн дуусав. Энэ бол Засгийн газраас зарласан Шинэ сэргэлтийн бодлогын хүрээнд хэрэгжүүлж буй хөгжлийн томоохон төслүүдийн нэг. Нээлтийн үйл ажиллагаанд Ерөнхий сайд “Манай улсын экспортын гол гарц Гашуунсухайт чиглэлийн 267 км төмөр зам 16 жил гацсаны эцэст өнгөрсөн есдүгээр сард дууслаа. Гэтэл бараг адилхан урттай Ханги-Мандлын 226.9 км төмөр замын ажлыг хоёрхон улиралд дуусгаж болдгийг өнөөдөр хамтдаа харлаа. Хэрэв экспортын төмөр замуудын бүтээн байгуулалт ийм хурдаар явсан бол өнөөдөр Монгол Улс гадаад өрийн дарамтгүй, эдийн засгийн багтаамж 100 орчим их наяд төгрөгт хүрчихсэн байх байлаа. Нэг хүнд ногдох ДНБ 10 мянган ам.доллар давж, иргэдийн амьдралын чанарт эрс өөрчлөлт гарчихсан байх байсан. Үүнийг л алдагдсан боломжийн өртөг гэдэг. Ийм харамсалтай алдааг бид дахин хэзээ ч давтах ёсгүй” гэж хэлсэн.
Монголд алдагдсан боломжууд их байна. Наад зах нь өнөөдөр бид эрчим хүчний асуудлаа бүрэн шийдчихсэн, нефтийн үйлдвэртэй болчихсон сууж байх байлаа. Гэвч хэсэг бүлэг олигархиуд гадны гар хөл бологчид Монгол Улсын хөгжлийг хэдэн арван жилээр хойш татсан. Ганцхан төмөр зам дээр гэхэд ямар их боломж алдсаныг Ерөнхий сайд дээр хэллээ. Тэрбээр алдагдсан боломжуудын өртгийг буруутай этгээдүүдээр нөхөн төлүүлэх асуудлыг хөндөж, ажил хэрэг болгож байгаа нь сайн байна. Мань эр дахиад нүүрсний хулгайн том сүлжээг задлахаар зоригтой эхлүүлсэн. Энэ бол асар их алдагдсан боломж. Өртгийг нь авчирч чадах уу, үгүй юү гэдэг нь Л.Оюун-Эрдэнийн хувьд том сорил болж байна. Уг нь хэлсэн бол хийх гээд байдаг Ерөнхий сайдтай болсон бид. Нүүрснээс алдсан боломжийг ард түмэнд хэзээ авчирч өгөхийг тэрбээр мэдэж байгаа биз ээ.
Төрд үүрлэсэн том, том луйвар, хулгайг үндсээр нь тасалж чадвал Монгол Улсын хөгжлийн зам дардан байна. Тэдэнтэй тэмцэх гол хүч бол залуу Ерөнхий сайдын зангараг юм. Ковидтой, эдийн засаг хумигдсан хүнд хэцүү цагт ажиллаж буй Л.Оюун-Эрдэнийн хувьд гараа хумихаад суулгүй алсыг харсан мега төслүүдийг эхлүүлсэн. Үе үеийн Засгийн газрын тэргүүний барьж авч зүрхлээгүй олон том ажлуудыг хэрэгжүүлж, эхнээсээ ард нь гарч чадсан нь түүнийг багаа хэрхэн залж чаддагийг харуулж байна. Л.Оюун-Эрдэнэ Ерөнхий сайдын зорьсон л бол ард нь гарч санаа нь амардаг чанар олон улсад төдийгүй хөрөнгө оруулагчдад зөв мессэж болж очно.
М.МӨНХЦЭЦЭГ
Эх сурвалж: Өдрийн сонин
