Сүүлийн өдрүүдэд тэрбумтан Илон Маск дэлхийн хамгийн том технологийн компани Apple-тай ил тод сөргөөцөлдөх болсон юм.

Тэрбээр Apple компани Твиттерийн аппликэйшнийг нь App Store дэлгүүрээсээ хасахаар сүрдүүлсэн хэмээн мэдэгдэж, хэрвээ ингэвэл iPhone-той өрсөлдөх өөрийн гар утсыг бүтээх тухай санааг цухуйлгаж байв.

Маск бас зарагдсан аппликэйшний орлогын 30 хувийг суутгадаг App Store-ийн бодлогыг шүүмжилж байжээ.

Харин өчигдөр тэрбээр Apple компанитай ойлголцож, маргаанаа шийдвэрлэсэн тухай мэдэгджээ.

Apple компанийн гүйцэтгэх захирал Тим Күк өөрт нь Калифорни дахь төв оффисоо танилцуулсан тухай Маск мэдээлээд тус оффисын хашаанд буулгасан дүрс бичлэгийг твиттер хуудсандаа нийтэлсэн юм.

Thanks @tim_cook for taking me around Apple’s beautiful HQ pic.twitter.com/xjo4g306gR

— Elon Musk (@elonmusk) November 30, 2022

Apple компанийн ажилтнууд бас Маск, Күк нар хамтдаа явж байсныг харснаа баталжээ.

“Твиттерийг App Store-оос хасах тухай үүссэн үл ойлголцлоо бид арилгалаа. Apple хэзээ ч энэ талаар бодож байгаагүйг Тим надад тодорхой хэлэв” гэж Маск бичсэн байна.

Тэрбээр оффисоо танилцуулсан Тим Күкт талархал илэрхийлээд тэдний хооронд “сайхан яриа хөөрөө” өрнөсөн тухай мэдээлжээ.

Эх сурвалж: Business Insider