Өмнөд Африкийн Бүгд Найрамдах Улсын ерөнхийлөгч Сирил Рамафоза анх сонгогдохдоо авлигатай хатуу тэмцэх мөрийн хөтөлбөртэй сонгуульд ялж байв.

Тэгвэл тэр өнөөдөр өөрөө авлигын хэргээр албан тушаалаасаа огцрох өндөр магадлалтай болжээ.

2020 онд түүний хувийн эзэмшлээс их хэмжээний бэлэн мөнгө хулгайд алдагдаж байсан нь саяхан ил болсон юм. ӨАБНУ-ын зүүн хойд хязгаарын Фала Фала фермээс тухайн үед $4 сая бэлнээр алдагдаж байжээ. Үүнээс $580,000 орчмыг нь арьсан буйдангийн бүрээсний цаана нуусан байв.

Рамафоза тухайн үед хэргийг хуулийн байгууллагуудад мэдэгдэлгүй нуун дарагдуулж, хувийн шугамаар мөрдөж байжээ. Ингэхдээ тэр хөрш Намиби улсын ерөнхийлөгчийн дэмжлэгтэйгээр мөнгө хулгайлсан этгээдүүдийг олж, эрүүдэн шүүж байсан гэдэг.

Мөн энэ хэргийг илрүүлэхэд оролцсон хүмүүст мөнгө төлж, нууцыг задруулахгүй байх амлалт авсан байна. Ерөнхийлөгчийн хувийн эдлэнгээс их хэмжээний мөнгө олдож байсан тухай дуулиан задрахад ӨАБНУ-ын парламент тусгай хороо байгуулж, мөрөөр нь шалгаж эхэлсэн юм.

Хорооны дүгнэлт Лхагва гарагт гарч, парламентад Пүрэв гарагт танилцуулах гэж байжээ. Гэвч ерөнхийлөгч Рамафоза чуулганд ирээгүй тул хойшлуулсан байна.

Тэрбээр эдлэнгээс нь алдагдсан мөнгө тайланд дурдсан шиг их хэмжээтэй байгаагүй, уг мөнгө нь үхэр зарж олсон орлого гэж тайлбарлаж байгаа юм.

Рамафозаг эх үүсвэр тодорхойгүй, данснаас гадуур их хэмжээний бэлэн мөнгө хадгалж байсан, гадаад улсын ерөнхийлөгчөөс хувиараа тусламж гуйсан нь үндсэн хуулийг зөрчсөн хэрэг гэх дүгнэлтийг парламентын тусгай хороо гаргажээ.

ӨАБНУ-ын парламент буюу Үндэсний Ассемблей ерөнхийлөгчийг хугацаанаас нь өмнө албан тушаалаас огцруулах (импичмент) арга хэмжээ авч болзошгүй болоод байна.

Эрх баригч Африкийн Үндэсний Конгресс нам энэ сарын 16-20-ны өдрүүдэд их хурлаа зохион байгуулж, Рамафозаг хоёр дахь удаагаа сонгуульд нэр дэвшүүлэх эсэх асуудлыг хэлэлцэх юм.

Гэхдээ тэр үүнээс өмнө улс төрийн замналаа өндөрлүүлж магадгүй болоод байна.

Эх сурвалж: CNN