Ерөнхий боловсролын сургуулийн сурагч доод ангийнхаа сурагчдыг зодож буй хоёр бичлэгийг цагдаагийн байгууллага шалгаж эхэлсэн тухай бид өмнө нь мэдээлсэн.
Цахим орчинд өнгөрсөн Бямба гарагт нийтлэгдсэн тухайн бичлэгүүдийг шалгахад, тухайн хэргийг үйлдсэн 17 настай, эрэгтэй Т болон М нар нь,
- хоёрдугаар сард 16 настай, хохирогч эрэгтэйг найз охинтой нь харилцаа тогтоолоо гэх шалтгаанаар биед нь халдсан,
- арваннэгдүгээр сарын 10-ны өдөр Баянгол дүүргийн нутагт үл таних эрэгтэйтэй маргалдаж, улмаар түүний биед нь халдсан болохыг тус тус тогтоожээ.
Дээрх гэмт хэргийн шинжтэй хоёр үйлдэл нь цагдаагийн байгууллагад урд өмнө бүртгэгдээгүй бөгөөд хэрэгт холбогдогч нар өөрийн гар утсанд дээрх бичлэгийг хадгалж байгаад, найзууддаа дамжуулснаар ийнхүү нийтэд ил болсон байна.
Одоогийн байдлаар хохирогчид гэмтлийн зэрэг тогтоох чиглэлээр Шүүх шинжилгээний үндэсний хүрээлэнгийн шинжээч эмч томилон шинжилгээ хийлгэх, хохирогч болон холбогдогч нарыг Дүүргийн гэр бүл, залуучуудын хөгжлийн хэлтэс, Хорооны хамтарсан багт холбон зуучлах зэрэг ажиллагааг хийгээд байгаа тухай Цагдаагийн Ерөнхий Газраас мэдээллээ.