Лхагва гарагт Америкийн тэрбумтан Илон Маск дэлхийн хамгийн баян хүний титмээ хэсэг хугацаанд алдаад буцаан авчээ.

Тэрбээр 2021 оны есдүгээр сард энэхүү алдрыг Амазоны үүсгэн байгуулагч Жэф Безосоос шилжүүлэн авч байв.

Гэвч Твиттер компанийг $44 тэрбумаар худалдан авсан наймааны улмаас түүний үүсгэн байгуулсан Тесла компанийн хувьцааны ханш тасралтгүй унаж, 47 хувиар буураад байгаа.

Твиттерт хэт анхаарал хандуулж, Теслагийн бизнес суларч болзошгүй гэсэн айдастай холбоотойгоор хөрөнгө оруулагчид хувьцаагаа зарж эхэлснээс арваннэгдүгээр сарын 8-нд Маскийн хөрөнгийн хэмжээ дэлхийн тэргүүн баян болсноос нь хойш анх удаа $200 тэрбумаас доош хэмжээнд хүрсэн юм.

Энэ оны дөрөвдүгээр сард Твиттерийг худалдаж авах санал тавьснаас нь хойш түүний хөрөнгийн хэмжээ $70 орчим тэрбумаар хорогдоод байна.

Бернар Арно

Лхагва гарагийн арилжааны үеэр дэлхийн баячуудын дэд байранд жагсаж буй Францын тэрбумтан Бернар Арногийн хөрөнгийн хэмжээ хэсэг хугацаанд Маскийн хөрөнгийн хэмжээнээс давжээ.

Арно нь Louis Vuitton, Dior, Tiffany, Fendi зэрэг тансаг эдлэлийн брэндүүдийг эзэмшигч LVMH компанийн тэргүүн юм.

Форбс сэтгүүлийн тооцоолсноор түүний хөрөнгийн хэмжээ сүүлийн байдлаар $185.3 тэрбумд хүрээд байгаа бол Илон Маскийн хөрөнгийн хэмжээ $185.7 тэрбум болжээ.

Эх сурвалж: Reuters