Эрдэнэт үйлдвэрийн уурхайчид 2022 оны эхний улиралд үйлдвэрлэлийн үндсэн үзүүлэлтүүдээ 100-аас дээш хувиар биелүүллээ. Оны эхнээс уулын цул гаргалтын төлөвлөгөө 101.6 хувь, хөрс хуулалт 100.8 хувь, хүдэр олборлолт 102.5 хувиар тус тус давж биелсэн байна. Өнгөрсөн гуравдугаар сард ч эдгээр үзүүлэлтүүд 100.5-аас 102.3 хувийн биелэлттэй гарчээ. Баяжуулагчид өнгөрч буй 3-р сард 2 сая 596 мянган тонн хүдэр боловсруулж, төлөвлөгөөг 102.9 хувиар, оны эхний улиралд нийт 7 сая 582 мянган тонн хүдэр боловсруулж, төлөвлөгөөг 101.8 хувиар тус тус биелүүллээ.
Энэ хугацаанд хүдэр дэх зэсийн агуулга 0.426 хувь, молибдены агуулга 0.0166 хувийн үзүүлэлттэй байснаар төлөвлөгөө 99.7-107 хувиар биеллээ.
Үйлдвэрийн газрын хамт олон эхний улиралд нийт 134.9 мянган тонн зэсийн баяжмал, 976 тонн молибдены баяжмал тус тус үйлдвэрлэн, экспортод ачуулж, баяжмалын чанарын төлөвлөгөөг 101.3-105.1 хувьд хүргэлээ, гэж Үйлдвэрлэлийн хэлтсээс мэдээлэв.
