Авлигатай тэмцэх газраас өнгөрсөн долоо хоногт нүүрсний хулгайн хэрэгт холбогдуулж нэр бүхий УИХ-ын таван гишүүнийг олон нийтэд зарласан. Уг ил болгосон гишүүд нь УИХ-ын гишүүн Ш.Раднаасэд, Б.Баттөмөр, Н.Наранбаатар, Ц.Сэргэлэн, Ц.Анандбазар нар билээ. Эдгээр гишүүд “Бид нүүрсний хулгайд ямар ч хамааралгүй. Нүүрстэй холбоотой бизнес эрхэлж үзээгүй, нүүрс гэдгийг түлж үзсэнээс хулгай хийж үзээгүй, ер нь нүүрсний гэх хэрэгт ямар ч холбогдолгүй намтар түүхтэй гишүүдийг сонгосон нь их хачирхалтай” хэмээн тус бүрдээ байр сууриа илэрхийлж ирсэн. Тэд “Та нар жинхэнэ хулгайчдаа зарла” гэж чуулганы хуралд тодорхой байр сууриа илэрхийлсэн. МАН-ын дээрх нэр бүхий таван гишүүнээс энэхүү асуудлыг эрс эсэргүүцэж, нийгэмд зарим шуугиантай хэргүүдийн сэжүүрийг ил тод, хамгийн чангаар хэлж байгаа нь УИХ-ын гишүүн Ш.Раднаасэд юм. Тэрээр өнгөрсөн УИХ-ын сонгуулиас хойш өдийг хүртэл нийгэм, улс төрийн асуудлаар тодорхой байр суурь илэрхийлээгүй, өөрөөр хэлбэл “чимээгүй” сууж ирсэн. Харин АТГ-аас нэрийг нь хулгайн хэрэгт холбогдуулан зарлахад “дуу” орж, ёстой гишүүнийхээ ажлыг хийж эхэллээ хэмээн хэлэх хүмүүс цөөнгүй байна. Нөгөөтэйгүүр эдгээр таван гишүүн өөрсдийгөө нүүрсний хулгайд ямар ч хамааралгүй гэж удаа дараа мэдэгдэж ирсэн. Улмаар өнгөрсөн долоо хоногийн сүүлээр эдгээр таван гишүүн нүүрсний хулгайтай тэмцэх, шалгах “Лобби” бүлэг байгуулж байгаагаа мэдэгдсэн билээ. Тус бүлэг иргэдийн шаардсан нэрсийг гаргах, өөрсдийнх нь хэлээд буй жинхэнэ нүүрсний хулгайчдыг олон нийтэд ил болгохоо зорилго, чиглэлээ болгон ажиллах аж. Дашрамд дурдахад, лобби бүлэг ямар учраас байгуулдаг болох талаар товч хүргэе. УИХ-ын гишүүд тодорхой нэг чиглэл, сэдвийн хүрээнд лобби бүлэг байгуулдаг. Лобби бүлгийн зорилго нь шийдвэр гаргах хүрээлэлд нөлөөлж тухайн асуудлаа шийдвэрлүүлэх юм. Энэ утгаараа нүүрсний хулгайд нэр холбогдсон гишүүд УИХ-д “Лобби” бүлэг байгууллаа. Энэхүү бүлэгт сөрөг хүчин буюу Ардчилсан намаас гурав, эрх баригч буюу Монгол ардын намаас 15 гишүүн нэгдсэн байна. Тухайлбал, АН-аас С.Ганбаатар, Ж.Батсуурь, Ш.Адьшаа нар нэгджээ. Харин МАН-аас Ш.Раднаасэд, Б.Баттөмөр, Ц.Сэргэлэн, Ц.Анандбазар, Н.Наранбаатар, Ё.Баатарбилэг, Х.Баделхан, Д.Батлут, Э.Батшугар, Ч.Булгантуяа, Г.Ганболд, Х.Ганхуяг, Ц.Идэрбат, Ж.Мөнхбат, Ц.Сандаг-Очир нарын гишүүн нэгджээ. УИХ-д суудалтай ХҮН-аас энэхүү лобби бүлэгт одоогоор гишүүд нэгдээгүй ажээ. Цаашид нүүрсний хулгайг илрүүлэх буюу тэдний хэлж байгаагаар “жинхэнэ” хулгайчдыг илрүүлэх дээрх лобби бүлэгт нэгдэх сонирхолтой гишүүд цөөнгүй байгааг эх сурвалж мэдээллээ.
Э.МӨНХТҮВШИН
Эх сурвалж: Өдрийн сонин
